Monday, Nov 20th

Last update08:49:05 PM GMT

தலைப்புச் செய்திகள்:
You are here: வாழ்த்துக்கள் பண்டிகைகள் / கொண்டாட்டங்கள்

நத்தார் பண்டிகை வாழ்த்துக்கள் - 2014

E-mail Print PDF

ஆதரவு அற்றோருக்கு அடைக்கலமாய்

அகிலம் முழுவதுக்கும் அன்புத் தெய்வமாய்

பாரம் சுமப்போருக்கு சுமைதாங்கியாய் வந்துதித்த

பாலன் யேசு பிறந்த இவ் இனிய

நன்நாளை நத்தார் பண்டிகையாக கொண்டாடும்

அன்பு உள்ளங்கள் அனைவருக்கும்

எங்கள் மகிழ்ச்சி பொங்கிய  நத்தார் பண்டிகை வாழ்த்துக்கள்

Merry Christmas

பணிப்புலம்.கொம்

 


 

இன்பம் பொங்கும் தீபாவளி வாழ்த்துக்கள் - 29.10.2016

E-mail Print PDF

இன்பம் பொங்கும் இத் தீபாவளித் திருநாளில்

எமது பேரன்பிற்கும், நல் மதிப்பிற்கும், நல் உறவிற்கும் உரிய

வாசகர்கள், பங்காளிகள், நேயர்கள், உறவுகள், ஊர்மக்கள், புலம் பெயர்ந்து வாழும்

அனைத்து தமிழ் உள்ளங்களுக்கும்

"எமது இனிய தீபாவளி நல் வாழ்த்துக்கள்"

தீபாவளி வாழ்த்து

தீப ஒளி வீசும் இந் நன்னாளில்
ஞான ஒளி தேடி வேண்டுவோம்

அஞ்ஞான இருள் நீங்கி என்றும்
விஞ்ஞானம் நிறைந்த இவ்வுலகில்

மெய்ஞானம் கொண்டு வாழ
சொற்சுவையுடன் இறைவனைப் பாடி

அறுசுவைப் பண்டங்களுடன் அவனை நாடி
அருஞ்சுவையாம் அவன் அருள் பெறுவோம்!

தன்னை எரித்துக்கொண்டு தீபம்
உன்னை ஒளியோடு வாழச்செய்யும்

தியாகத்தை உணர்த்தும் தீபாவளி
ஞாலம் போற்றும் திருநாளாம்!

மாலுக்கும் மண்ணின் தாய்க்கும் பிறந்து
பாலூட்டி வளர்த்தாலும் தன் மகன்

அசுரனானதால் அவன் தாய்முன்னேயே
வதைத்த கண்ணனைப் போற்றும் பெருநாள்!

உலகிலேயே சிறந்த சுவை இனிப்பு
இனிப்புடன் நாம் என்றும் உறவாட

வெடிகொண்டு இவ்வுண்மையைப் பறைசாற்றி
இன்பமாய் வாழ்வோம் பல்லாண்டு!

பணிப்புலம்.கொம்

"அஷ்டலக்ஷ்மிகளின் தீப ஒளியினிலே தீயன மறைந்து நல்லன பிரகாசிக்கட்டும்"

பணிப்புலம்.கொம்
"பணி செய்வதே பணி"

உங்கள் நண்பர்கள், உறவினர்களுக்கு உங்கள் வாழ்த்துக்களை கீழே பதிவிலிட்டு பகிர்ந்து கொள்ளலாம்

நன்றி

 

 

 

 


உலகத் தொழிலாளர்களின் தியாகத்தில் உருவானதே தொழிலாளர் தினம் எனும் "மே தினம்"

E-mail Print PDF

பார் முழுதும் வாழும் பரந்துபட்ட தொழிலாளர்களின் வலிகளுக்கு  மருந்து போட்ட நன்னாள்,..  காலவரையற்ற உழைப்பு,  மிருகத்தனமான, கொத்தடிமைத்தனமான இன்னல்களில் இருந்து உழைக்கும் வர்க்கம் தங்களை விடுவித்துக்கொண்டு உயிர்த்தெழுந்த உன்னத நாளே மே 1 தொழிலாளர் தினம்….

மே 1 தொழிலாளர்களின் வெற்றி நாளாக, விடியல் நாளாக, விடுமுறை நாளாக, ஆஸ்திரேலியாவில் அவதாரம் கண்டது. அந்த விடியல்; உலகம் முழுக்க வியாபிக்க 33 ஆண்டுகள் பிடித்தது. 1889ஆம் ஆண்டு உலகம் முழுதும் ஒட்டுமொத்த தொழிலார்களின் புரட்சி விழா கொண்டாடப்பட்டது.

Read more...

சித்திரைப் புத்தாண்டு வாழ்த்துக்கள் - ஜய வருஷப் பிறப்பு கருமங்கள் - 14.04.2014

E-mail Print PDF

ஓம்


"ஜய" புத்தாண்டே வருக வருக, துன்பங்கள் நீங்கி இன்பம் பொங்க அருள் தருக

வாக்கிய பஞ்சாங்கப்படி ஜய வருஷப்பிறப்புக் கருமம் (இலங்கை நேரப்படி)
கலியுகாதி சுத்ததினம் 1868296, நாடி 00 வினாடி 12, தற்பரை 30க்குச் சரியான ஜய வருஷம் சித்திரை மாதம் 01திகதி (14.04.2013) திங்கட்கிழமை காலை நாடி 00 விநாடி 12 (06 மணி 11 நிமிடத்திற்கு ) பூர்வபக்க சதுர்த்தசித் திதியில், அத்தநட்சத்திரத்தின் இரண்டாம் பாதத்தில் வியாகாத நாமயோகத்தில் வணிசக்கரணத்தில், மேடலக்கினத்தில், மேடநவாம்சத்தில், சந்திரன் காலவோ ரையில், சந்திர  சூக்குமவோரையில், சாத்விககுணவேளையில் நட்சத்திரபட்சி யாகிய காகம் நடைத் தொழிலும் சூக்கும பட்சி நடைத்தொழிலும் செய்யுங் காலத்தில் இப்புதிய ஜய வருஷம் பிறக்கிறது. முதல் நாள் இரவு நாடி 50 விநாடி 12 (மணி 2.11) முதல் அன்று முற்பகல் நாடி 10 விநாடி 12 (மணி10.11) வரை விஷ{ புண்ணியகாலமாகும்.

இப்புண்ணிய காலத்தில் யாவரும் மருத்துநீர் தேய்த்து சிரசில் ஆலமிலை, காலில் விளாவிலையும் வைத்து ஸ்நானஞ்செய்து வெண்மை, சிவப்பு நிறமுள்ள பட்டாடையாயினும், வெண்மை, சிவப்புக்கரை அமைந்த புதியபட்டாடையாயினும் தரித்து பவளம்,முத்து இழைத்த ஆபரணமணிந்து வழிபாடு செய்க.

புதுவருடப்பிறப்பு :14-04-2014 திங்கட்கிழமை
நேரம் :காலை 06.11 மணி
புண்ணியகாலம் :அதிகாலை மணி 02.11 முதல் முற்பகல் 10.11 வரை  

திருக்கணிதப்பஞ்சாங்கப்படி ஜய வருஷப்பிறப்புக் கருமம் (இலங்கை நேரப்படி)
ஜய வருஷம் சித்திரை மாதம் 01-ம் திகதி (14-04-2014) திங்கட்கிழமை காலை உதயாதி நாழிகை 03.56 மணி காலை 07.36இல் "ஜய” என்னும் பெயருடைய புதுவருஷம் பிறக்கின்றது. அன்று நட்சத்திரம் அத்தம் 2-ம் பாதம், திதி பூர்வபக்க சதுர்த்தசி, சித்த யோகம். இது 60 வருட சுற்று வட்டத்தில் 28 ஆவது வருஷமாகும். அன்று திங்கட்கிழமை அதிகாலை நாழிகை 53.56 (மணி 03.36) முதல் பகல் நாழிகை 13;.56 (மணி 11.36) வரையும் மேட சங்கிரமண புண்ணியகாலம் ஆகும். வருஷம் பிறக்கும் போது உதயலக்கினம் "மேடம்” ஆக அமைகின்றது.

இப்புண்ணிய காலத்தில் சகலரும் சங்கற்பபூர்வமாக மருத்து நீர் வைத்து தலையில் விளா இலையும், காலில் கடம்பமிலையும் வைத்து ஸ்நானஞ்செய்து, வெண்ணிற பட்டாயினும் அல்லது வெள்ளைப் புது வஸ்திரமாயினுந் தரித்து, முத்து சேர்த்து இழைக்கப்பட்ட ஆபரணங் களையணிந்து, நித்திய அனுட்டானம் முடித்து, கண்ணாடி, தீபம், பூரண கும்பம் முதலிய மங்கலப் பொருட்களைத் தரிசித்து, விநாயகர் முதலிய இஷ்டகுல தெய்வங்களைத் தரிசனம் செய்து, புதுவருட சூரியனுக்கு பொங்கல், பூசை செய்து, இயன்ற தானாதிகள் வழங்கி, குரு, பெற்றோர் முதலிய பெரியோர்களை வணங்கி, அவர்கள் ஆசிபெற்று, பிதிர் விரதானுசாரிகள் சிரார்த்தம், தர்ப்பணம் என்பன செய்து, நண்பர்கள், விருந்தினர்களை வரவேற்று, உபசரித்து, சுற்றத்தினருடன் இருந்து பால்பாயசம், தயிரன்னம், நெல்லிக்காய்த் துவையல் முதலியவற்றுடன் அறுசுவைப் பதார்த் தங்களையும் போஜனஞ் செய்து, தாம்பூலமருந்தி, சுகந்த சந்தன புஸ்பாதகளையணிந்து, புதுப்பஞ்சாங்க பலன்களைக் கேட்டு புதுவருடத்தில் ஆற்றக்கூடிய நற்கருமங்களைச் சிந்தித்து மங்களகரமாக வாழ்வார்களாக.

சங்கிரம தோஷ நட்சத்திரங்கள்: ரோகிணி, உத்தரம் 2ம், 3ம், 4ம் கால்கள்;, அத்தம், சித்திரை _ 1ம், 2ம் கால்கள், திருவோணம், அவிட்டம் 3ம், 4ம் கால்கள், சதயம், பூரட்டாதி 1ம், 2ம், 3ம் கால்கள்;.

புதுவருடப்பிறப்பு: 14-04-2014 திங்கட்கிழமை காலை 07.36 மணி
புண்ணியகாலம்: அதிகாலை மணி 03.36 முதல் பகல் மணி 11.36 வரை.

கைவிசேடம்:
14.04.2014 திங்கள் உதயம் 06.02 முதல் 07.30 வரை - பகல்   10.00 முதல் 12.05 வரை
16.04.2014 புதன்   உதயம் 06.01 முதல் 07.37 வரை

”ஜய வருஷம்” எனும் புதிய புத்தாண்டு எதிர்வரும் 13.04.2014 ஞாயிற்றுக்கிழமை கனடா, அமெரிக்கா போன்ற வட-அமெரிக்க நாடுகளிலும்; 14.04.2014 திங்கட்கிழமை இலங்கை, இந்தியா போன்ற நாடுகளிலும் பிறப்பதாக சோதிடம் கணித்துள்ளது. இராசி மண்டல வலயத்தில் உள்ள மேஷ ராசியில் சூரியன் உதயமாகும் தினமே தமிழ்-இந்துக்களின் புது வருடப்பிறப்பாக கொண்டாடப் பெறுகின்றது. சூரிய பகவான் மீண்டும் மேஷ ராசிக்கு வரும் வரை உள்ள காலம் ஓர் தமிழ்-வருஷமாகும்.

ஆலயத்தில் நாம் அங்கப்பிரதஷ்டை செய்யும்போது நாமும் சுழன்று கொண்டு ஆலயத்தையும் சுற்றி வலம்வருவதுபோல்; பூமியானது தன்னைத்தானே சுற்றிக் கொண்டு சூரியனையும் சுற்றி வலம்வருவதும், ஒருமுறை சுற்றிவர ஒரு வருட காலம் எடுக்கும் என்பதும் நிரூபிக்கப்பெற்ற உண்மைகள்.

பூமி சூரியனை சுற்றும் போது சோதிடம் கூறும் 12 ராசிகளில் முதல் ராசியாகிய மேடராசியில் சூரியன் பிரவேசிக்கும் தினமே வருடப் பிறப்பாக கணிக்கப்பெறுகின்றது. இத்தினத்தையே சிங்கள பௌத்த மதத்தினரும் இந்து மதத்தினரைப்போல் தமது புத்தாண்டாக கொண்டாடுகின்றனர். (இயற்கையாகவே பூமியும் எல்லாக் கிரகங்களும் சூரியனை சுற்றி வருகின்ற போதிலும்; பூமியை  சுற்றியுள்ள  Zodiac என ஆங்கிலதில் அழைக்கப்படும் கற்பனையான இராசி மண்டல வலயத்தினூடாக சூரியன் உள்ளிட்ட எல்லாக் கிரகங்களும் பூமியை சுற்றி வருவதாக சோதிடம் கணிக்கின்றது.)

இப் பூவுலகம் தோன்றியதில் இருந்து பூமியானது சூரியனைச் சுற்ற ஆரம்பித்தது. சூரியனும், பூமியும் கோள வடிவினதாகவும், ஈர்ப்பு விசையுடன் சுழன்று கொண்டு இருப்பதனால் அவை குறிப்பிட்ட காலத்தின் பின்னர் சுற்றத் தொடங்கிய இடத்திற்கு வந்து சேர வேண்டும் என்பது இயற்கையின் நியதி. அப்படி வந்தும் (திரும்பவும்) தொடர்ந்து சுற்றிக்கொண்டே இருப்பதனால்  சுற்று ஆரம்பித்த அந்த நிகழ்வானது பிறப்பாகவும், அச்சுற்றை திரும்பத் திரும்ப ஆரம்பிக்கும் தினம் பிறந்த தினமாகவும் கொண்டாடுவதாக கூறலாம். அதாவது, மீண்டும் ஒருமுறை சூரியன் மேடராசியில் பிரவேசிக்கும் நாளே (பூமியின் பிறந்த நாளே) சித்திரை வருடப்பிறப்பாக கொண்டாடப்படுகின்றது.

Read more...

எல்லோரும் எல்லாமும் பெறும் சுபீட்சம் நிறைந்த ஆண்டாக 2014 மலரட்டும் - பணிப்புலம்.கொம்

E-mail Print PDF

புத்தாண்டே புத்தாண்டே வருக, வருக  - பாடல் கேட்க இங்கே அழுத்துங்கள்

நீங்களும் உங்கள் நண்பர்கள், உறவினர்களுக்கு உங்கள் வாழ்த்துக்களை கீழே பதிவிலிட்டு பரிமாறிக் கொள்ளலாம்

நன்றி

”அம்மா” (அன்னையர்) தின வாழ்த்துக்கள் -

E-mail Print PDF

கண் கண்ட அன்புத் தெய்வத்திற்கு எமது நல்வாழ்த்துக்கள்

பணிப்புலம்.கொம்

பத்து மாதம் சுமந்திருந்து பெற்று, பகல் இரவாய் விழித்திருந்து வளர்த்து,  நாளெல்லாம் பட்டினியாய் தான் இருந்தாலும், ஒரு கணமேனும் நம் பசி பொறுக்காது உணவூட்டி;  மேலெல்லாம் இளைத்திடப் பாடுபட்டே எம்மை வித்தகனாய் கல்வி பெற வைத்து, மேதினியில் மேன்மையாய் நாம் வாழச் செய்த அந்த கண்கண்ட தெய்வத்தை வாழ்த்தி வணங்கி, பணிவிடைகள் செய்து மகிழ்விக்க ஒருநாள் போதுமா?

அன்னையர் தினம் என்பது வருடத்தில் ஒருநாள் (மே மாதத்தில் வரும் இரண்டாவது ஞாயிற்றுக்கிழமை) இவ் வருஷம் 08.05.2016 அன்று அன்னையரை சந்தித்து பரிசில்கள் வழங்கி மகிழ்விக்கும் நாளாக மேல்நாட்டவர்கள் கொண்டாடும் இக்கால கட்டத்திலும்; வெளிநாடுகளில் வாழும் பெரும்பாலான தமிழர்கள் தம் வாழ்வில் எல்லா நாளையும் அன்னையர் தினமாகவே மதித்து அன்னையை மகிழ்விக்கின்றார்கள்.

தனது உணவில் ஒரு பகுதியை கருவிலிருக்குபோது 10 மாதங்களாக ஊட்டி வளர்த்து, குழந்தையாக பிரசவித்த பின்னர் தனது உதிரத்தையே பாலாக மாற்றி பருகத்தந்து வளர்த்தெடுப்பவளும். தன் அன்பு நிறைந்த இனிய மொழிகளால் உலகம் போற்றும் உத்தமர்களாக உருவாக்குபவளும் அன்னையே. உந்தியிலும், மடியினிலும், தோழிலினிலும் சுமந்து உணவூட்டி, தாலாட்டி, சீராட்டி வளர்த்தெடுத்த அந்த அன்புத் தெய்வத்தை ஆதரித்து அன்பு செலுத்த ஒருநாள் போதுமா?

அதனால்போலும் கீழைத்தேய பாரம்பரியங்களுக்கு அமைய இலங்கை, இந்தியா, பாகிஸ்தான், பங்களாதேஷ் மற்றும் அரபு நாடுகளின் மக்கள் தங்கள் அன்னையரை மிக உயர் நிலையில் வைத்து அன்புடன் கெளரவமாக, வாழ்நாள் பூராவும் பணிவிடை செய்து, நன்றிக்கடனை செலுத்திக் கொண்டிருக்கிறார்கள்.

பொதுவாக கீழைத்தேசதில் வாழும் தமிழர்களும் மற்றைய சமூகத்தினரும் தன்னை  பெற்று வளர்த்து, அறிவூட்டி இவ்வுலகில் வாழ்வாங்கு வாழ வழிகாட்டிய அன்னையை வயதான காலத்திலும் தம்முடனேயே வைத்திருந்து அவர்களுக்கு தினம் தினம் பணிவிடைகள் செய்து பராமரித்து பரிசில்கள் வழங்கி மகிழ்விக்கும்போது "அன்னையர் தினம்" என ஒருநாள் தேவையே இல்லை எனலாம்.

அதனால்தான், அவர்கள் மேற்குலகம் கொண்டாடும்  அன்னையர் தினத்தை ”போற்றும் நாள்” ஆக பிள்ளைகள், உற்றார், உறவினர் எல்லோரும் ஒன்றுகூடி விழா எடுத்து அவர்களுக்கு பரிசில்கள் வழங்கி மகிழ்வூட்டி அவர்களின் ஆசீர்வாதம் பெறும் சிறப்பான நாளாகவே கொண்டாடுகிறார்கள்.

“தாயிற் சிறந்த கோயிலுமில்லை" என்ற வரிகள் தாய்மையின் “புனிதத்துவம்”, தாய்மையின் “பெருமை”, தாய்மையின் “தியாகம்” தாய்மையின் “கருணை உள்ளம்” போன்றவற்றை எடுத்துக் கூறத்தக்க வரிகளாகும். இந்த உலகில் தாய்க்கு ஈடாக ஒப்பிட எதுவுமே இல்லை என்பதனால் கோயிலாக ஒப்பிடுகிறார்கள் எனலாம். “அம்மா..” என்ற இன்சொல்லில் புதைந்துள்ள அர்த்தங்கள் ஆயிரமாயிரம். ஒருவர் தனது இன்பத்தின் போதும், துன்பத்தின்போதும் கூவி அழைக்கும் அன்புத் தெய்வமும் அம்மாவே.

ஒரு பெண்ணானவள் மகளாக, சகோதரியாக, தாயாக, தாரமாக, தோழியாக வீட்டிலுள்ளோரைப் பக்குவப்படுத்தும் பாட்டியாக, அனுபவங்களின் அரவணைப்பில் வழி நடத்திச்செல்லும் ஆசானாக இப்படி தன் வாழ்நாளில் எத்தனையோ பாத்திரங்களில் வலம் வந்தாலும் “அன்னை” என்ற பாத்திரம்தான் மிக உன்னதமான இடத்தை வகிக்கின்றது. தாய்மை என்பது ஓர் உன்னதமான உணர்வு. அத்தகைய தாயைப் போற்றவே மே மாதத்தின் இரண்டாவது ஞாயிற்றுக்கிழமையை மேற்குலக நாடுகளில் அன்னையர் தினமாகக் கொண்டாடப்படுகிறது

நாகரீகம் படைத்த மேற்குலக நாடுகளில் அன்னையர் தினம் அந்த குறிப்பிட்ட தினத்தில் மாத்திரமே மிகவும் கோலாகலமாக கொண்டாடப்படுகிறது. வருடத்தில் 365 நாட்களும் மேற்கத்திய நாடுகளின் முதுமை நிலை அடைந்துள்ள அன்னையர் வயோதிப மடத்தில் அல்லது ஒரு பராமரிப்பு நிலையத்தில் தங்கள் வாழ்க்கையின் இறுதி நாட்களை ஓட்டிக் கொண்டிருப்பார்கள். அவர்களுக்கான பராமரிப்பு செலவினத்தை மேற்கத்திய நாடுகளின் அரசாங்கங்களே பொறுப்பேற்கின்றன. ஓரிரு அன்னையரின் பிள்ளைகளே தங்கள் செலவில் தங்களுடைய தாய்மாரை வசதியான கூடிய கட்டணம் அறவிடும் பராமரிப்பு நிலையங்களில் சேர்த்திருப்பார்கள். அவர்கள் கூட தங்களின் சகல வசதிகளையும் உடைய மாடமாளிகைகளில் தங்கள் அன்னையரை வைத்து பராமரிப்பதில்லை.

சில அன்னையரின் பிள்ளைகளே கிறிஸ்மஸ் தினம், புத்தாண்டு தினம், அன்னையரின் பிறந்த தினம் ஆகிய மூன்று நாட்களில் அன்னையரை சென்று சந்தித்து அவர்களுக்கு பரிசுகளை கொடுத்து விட்டு திரும்புவார்கள். பொதுவாக மேற்கத்திய நாடுகளில் உள்ளவர்களில் பெரும்பாலானோர் தங்கள் அன்னையரை அன்னையர் தினத்தில் மாத்திரமே போய் பார்த்து பூச்செண்டுகளையும், அன்பளிப்புகளையும் கொடுத்து அவர்களை மகிழ்விப்பார்கள். இது அன்னையர் மீது கொண்டுள்ள அன்பினால் அவர்கள் செய்வதில்லை. சம்பிரதாயத்தை கெளரவிக்கும் முகமாகவே இந்த நிகழ்வுகளில் கலந்து கொள்கிறார்கள்.

உலக அளவில் தாய்மையை போற்றும் வகையில் கொண்டாடப்படும் அன்னையர் தினம் (Mother's Day) ஏனைய சர்வதேச தினங்களைப் போல ஒரு குறித்த நாளில் கொண்டாடப்படுவதில்லை. அன்னையர் தினம் அமெரிக்கா, இங்கிலாந்து, இந்தியா, டென்மார்க், பின்லாந்து,  இத்தாலி, துருக்கி, ஆஸ்ட்ரேலியா, மெக்சிகோ, கனடா, சீனா, ஜப்பான் உள்ளிட்ட பல நாடுகளில் அன்னையர் தினம் ஒவ்வொரு வருடமும் மே மாதம் இரண்டாம் ஞாயிற்றுக்கிழமை அன்று கொண்டாடப்பட்டு வருகிறது.  வேறு சில நாடுகள் அதற்கு முன்போ அல்லது பின்போ கொண்டாடுகின்றன.

"அன்னையர் தினம் " Mother's Day உலகெங்கும் கொண்டாடக் காரணமாக இருந்த பின்னணி பற்றி நாம் ஒரு சிறிய விளக்கத்தைப் பெற்றுக்கொள்ளல் வேண்டும். அன்னையர்களுக்கு மரியாதை செலுத்தும் சம்பிரதாயம் புராதன காலத்திலே தொடங்கி விட்டதாக வரலாற்று சான்றுகள் பகருகின்றன. பண்டைய கால மனிதர்களால் அன்னையர் புராணங்கள் கதையாக வழங்கப்பட்டு வந்தன. இதில் முக்கியமாக பெண் - கடவுளான சைபீல் என்ற கடவுள் வணங்கப்பட்டாள். இந்தப் பெண் தெய்வமே எல்லாக் கடவுளுக்கும், முழு முதல் தாய்க் கடவுளாக அம்மக்களினால் வணங்கப்பட்டுள்ளது. வருடத்திற்கு ஒரு முறை இந்த முழுமுதல் தாய்க் கடவுளுக்கு பிரிஜியா மக்களால் விழா எடுக்கப்பட்டு வந்தது. இந்த விழாவே அன்னையர்களை மரியாதை செய்யும் முதல் விழா கொண்டாட்டமாகக் கருதப்படுகிறது.

வசந்த காலத்தின் துவக்கத்தை கிரேக்கர்கள் பல வகைகளில் கொண்டாடினர். அதில் தாய் தெய்வத்தை வணங்குவதும் ஒன்றாகும். கிரேக்கர்கள் தெய்வமாக வழிபட்டு வந்த க்ரோனஸின் மனைவி ரேஹாவைத்தான் அவர்கள் தாய் தெய்வமாக வழிபட்டனர்.

ரோமர்களும் வசந்த கால கொண்டாட்டத்தின் ஒரு பகுதியாக சைபெலி என்ற பெண் தெய்வத்தை தாயாக கருதி வழிபட்டனர். இந்த வழிபாடு என்பது கலை நிகழ்ச்சிகள் விளையாட்டு வீர சாகசங்கள் என பல்வேறு விஷயங்கள் இடம்பெறுவதாக அமைந்தது. ரோமானியர்கள் தங்களது தாய்- கடவுளுக்கு பாலடைன் மலையில் கோயில் ஒன்றை எழுப்பினர். ஒவ்வொரு வருடமும் மார்ச் 15ம் தேதி மூன்று நாள் விழா நடத்தினர். விழாவின் போது இக்கடவுளுக்கு பலவிதமான படையல்களும் செய்யப்பட்டன.

கிறிஸ்தவத்தின் வருகைக்கு பின்பு இந்தக் கொண்டாட்டம் மாதா திருக்கோயிலுக்கு மரியாதை செய்வதாக மாறியது. இயேசுபிரான் பாலையில் கழித்த 40 நாளை நோன்பு இருந்து கொண்டாடும் விழா- நாட்களில் நான்காவது ஞாயிற்றுக்கிழமைகளில் மக்கள் தங்கள் ஞானஸ்னானம் செய்விக்கப்பட்ட திருக்கோயில்களுக்கு பரிசுகள் கொண்டு வரும் விதமாக அன்னையர் தினம் கொண்டாடப்பட்டதாக கூறப்படுகின்றது. மத்திய காலத்தில் தனது தாயை ஒரு குறிப்பிட்ட தினத்தில் அன்பளிப்புகள் வழங்கி கௌரவித்ததாகவும் சில ஆதாரங்கள் தெரிவிக்கின்றன..

இவ்வாறான நிலையில் 20ம் நூற்றாண்டின் ஆரம்பத்தில் நவீன காலத்தில் உலகளாவியரீதியில் அன்னையர் தினம் கொண்டாடுவதற்கான சந்தர்ப்பம் உருவான வரலாற்றின் பின்னணி பின்வருமாறு அமைந்திருந்தது.

"ஜார்விஸ்" என்ற பெண் சமூக சேவகி அமெரிக்காவின் மேற்கு வேர்ஜினியா மாநிலத்தில் கிராப்டன் (GRAFTON) என்ற கிராமத்தில் வாழ்ந்து வந்தார். அக்காலத்தில் யுத்த களத்தில் அமெரிக்க வீரர்கள் பலியாயினர். அவர்களின் குடும்பங்களும் சிதைந்து சீரழிந்து நாலாபக்கமும் சிதறிப்போயினர்.. பிரிந்த குடும்பங்கள் ஒன்று சேரவும், அவர்களின் நல்வாழ்க்கைக்கும், சமாதானத்திற்கும் தன் இறுதி மூச்சுவரை அயராது பாடுபட்டு சமூக சேவகியாகவே வாழ்ந்து 1904ல் Jarvis மறைந்தார். இவரின் மகள் அனா ஜார்விஸ் Anna Jarvis முதன்முதலாக தனது அன்னையின் நினைவாக உள்ளூரில் உள்ள மெத்தடிஸ்ட் சர்ச்சில் 1908ம் ஆண்டு மே மாதத்தில் ஒரு ஞாயிற்றுக்கிழமை சிறப்பு வழிபாடு ஒன்றை நடத்தினார். தனது அன்னையைப் பாராட்டி சீராட்டி அன்னையர் தினம் கொண்டாடிய முதல் பெண் என்ற பெருமையையும் இவர் பெறுகிறார். சமூக நலனில் அக்கறை கொண்ட ஜார்விஸ் ஏதாவது ஒரு நாளையாவது எல்லோரும் தங்களது தாயை அவர் உயிரோடு இருந்தாலும் சரி இல்லாவிட்டாலும் சரி அவளது தியாகத்தையும் தங்களுக்கு அவள் செய்த ஈடு இணையற்ற பணியையும் நினைத்து அவளை கெளரவிக்க வேண்டும் என்று விரும்பினார்.

இதைத் தொடர்ந்து அனா ஜார்விஸ் Anna Jarvis 1913ம் ஆண்டில் தன் பணி நிமித்தம் பென்சில்வேனியா மாநிலத்தில் பிலடெல்பியாவில் குடியேறினார். தாயார் விட்டுச்சென்ற சமூக சேவையை மகள் ஜார்விஸ் தன் தனிப்பெரும் கடமையாகக் கருதித் தொடர்ந்தார். கஷ்ட்டப்படுகிற, வாழ்க்கையில் இன்னலும், சோதனைகளும் ஒருசேரத் தாக்கி மனம் வெந்து, நொந்து சமூகத்தில் ஓரங்கட்டப் பட்டவர்களுக்கான அமைப்பில் தன்னை இணைத்துக் கொண்டார். தன் தாயாரின் நினைவாகவும், தத்தம் வீடுகளில் அவரவர் அன்னையர்களும் கெளரவிக்கப் பட வேண்டும். எல்லோர் இல்லங்களிலும் அன்றையதினம் மகிழ்ச்சி ததும்ப வேண்டும் என்று எண்ணினார். தம் எண்ணத்தை பென்சில்வேனியா மாநில அரசுக்குத் தெரிவித்தார். அரசும் அவர் கருத்தை ஏற்று 1913ம் ஆண்டு முதல் அன்னையர் தினம் என அங்கீகரித்து அறிவித்தது.

மாநில அரசு அங்கீகரித்தாலும் அனா ஜார்விஸ் திருப்தி அடையவில்லை. ஆயிரக்கணக்கில் அரசியல்வாதிகளுக்கும், தன்னார்வ அமைப்புகளுக்கும், வர்த்தக அமைப்புகளுக்கும் கடிதங்கள் எழுதி அமெரிக்கா முழுவதும் "அன்னையர் தினம்" கொண்டாடவும் அந்நாளை அரசின் விடுமுறை நாளாகவும் அங்கீகரித்து அறிவிக்க வேண்டுமெனவும் குறிப்பிட்டிருந்தார். அமெரிக்க ஜனாதிபதிக்கும் இதேவேண்டுகோளை விடுத்தார்.

இவரின் வேண்டுகோளையும், நியாயத்தன்மையையும் ஏற்றுக்கொண்ட அமெரிக்கா ஜனாதிபதி வுட்ரோ வில்சன் 1914ம் ஆண்டு வருடம்தோறும் மேமாதம் இரண்டாம் ஞாயிற்றுக்கிழமையை அதிகாரப்பூர்வமாக அன்னையர் தினமாகவும், அன்று விடுமுறை தினமாகவும் இருக்கும் அறிவிப்பை வெளியிட்டார். இவ்வறிவிப்பை அமெரிக்க காங்கிரசும் ஏற்றுக்கொண்டது. பின்பு கனடா அரசாங்கமும் ஏற்று அங்கீகரித்து அறிவித்தது. அதுமட்டுமல்ல 46 நாடுகள் இதே நாளில் "அன்னையர் தினம்" என அறிவித்து நடைமுறைப்படுத்தியது. தனது வேண்டுகோள் ஏற்றுக்கொள்ளப் பட்டதையிட்டு ஜார்விஸ் அளவற்ற மகிழ்ச்சியடைந்தாலும் முழுமனநிறைவடையவில்லை. 46 நாடுகளில் மட்டுமல்ல உலகமெங்கும் அன்னையர் தினம் கொண்டாடப்பட வேண்டும் என்ற எண்ணத்தில் அவர் தொடர்ந்தும் ஈடுபட்டார்.

உலகம் முழுக்க "அன்னையர் தினம்" அனுசரிக்கப்படவேண்டும். ஒவ்வொரு வீட்டிலும் அன்னையைப் போற்றுகிற, வாழ்த்துகிற, மகிழ்விக்கின்ற நாளாக அன்றைய தினம் மலர்ந்து மணம் பரப்ப வேண்டும் என்பதுதான் என் ஆசை என்று தனது 84வது வயதில் தனியார் மருத்துவமனையில் இறப்பதற்கு முன் தன்னைச் சந்தித்த நிருபர்களிடம் வெளிப்படுத்தினார். அவருடைய ஆசை இன்று அனேகமாக பூர்த்தியாகிவிட்டது என்றே சொல்லலாம்.

இன்று நாம் கொண்டாடும் அன்னையர் தினம் அன்னைகளுக்கெல்லாம் அன்னையாகத் திகழ்ந்த அனா ஜார்விஸ் என்பவரின் முயற்சியினாலேயே ஆரம்பித்து வைக்கப்பட்டது. அதேநேரம், அனா ஜார்விஸ் திருமணமானவரோ பிள்ளைகளைப் பெற்றெடுத்தவரோ அல்ல. அன்னைகளுக்காக அரும்பாடுபட்டவர் என்பதே உண்மை.

அன்னையர் தினத்தில் எமது அன்னையை மட்டுமல்ல அன்னையர்களின் நாம் மதித்து மகிழ்விக்க வேண்டும். அவர்களுக்காகப் பிரார்த்தனைகளைப் புரிய வேண்டும். மானசீகமான எமது அன்பை வழங்க வேண்டும். அன்னையை மதிப்பது ஒருநாளுக்கு மாத்திரம் மட்டுப்படுத்தப்பட்டதன்று. ஆனாலும், அன்னையர் தினம் என்று குறிக்கப்பட்ட தினத்தில் விசேட மதிப்பும், மகிழ்விப்பும் அன்னைக்கு வழங்கப்பட வேண்டும் எதிர்பார்க்கப்பட்டது.

எனவே, அன்னையர் தினம் என்பது ஒரு உயரிய தினம். அன்னையரை மகிழ்விக்க எமது சக்திக்கேற்றாற்போல் எதை செய்ய முடியுமோ அதை செய்வோம். ஏனெனில். அன்னையின் பெறுமானத்தை நாம் வழங்கும் அன்பினாலன்றி பணத்தினால் தீர்மானிக்க முடியாது. அன்னையர் தினம் என்பது உண்மையான அன்பிற்காகவும் தனது அன்னைக்கு நன்றி கூறும் விதத்திலும் இருக்க வேண்டும் என்று நினைத்துப் போராடிய அனா ஜார்விஸின் உண்மையான நோக்கத்தை நாம் புரிந்து இத்தினத்தை கொண்டாடுவோம்.

”உழைப்பு கொண்டு வந்தால்தான் மனைவி மனைவியாக இருப்பாள்
ஆனால் உழைப்பு கொண்டு வந்தாலும் கொண்டு வராவிட்டாலும் அம்மா அம்மாவாகவே இருப்பாள்”

அன்னையும் பிதாவும் பின்னடிக் இடைஞ்சல் - வாசிக்க இங்கே அழுத்துங்கள்

 


6644.09.05.2016

Page 3 of 9

முத்துமாரி அம்மன் ஆலயம்

ஞான வேலாயுதர் ஆலயம்

சித்தி விநாயகர் ஆலயம் - சாந்தை

சம்புநாதீஸ்வரர் ஆலயம்

காடேறி ஞானபைரவர் ஆலயம்