Thursday, Aug 16th

Last update12:42:19 AM GMT

தலைப்புச் செய்திகள்:
You are here: சமூக நோக்கு கட்டுரைகள்

கட்டுரைகள்

பணிப்புலம் பெற்றெடுத்த உத்தம நாயகன் – அமரர். சபாபதி அழகரத்தினம் ஐயா அவர்கள் - ஆக்கம்: கணபதிப்பிள்ளை கனகரத்தினம் – பணிப்புலம்

E-mail Print PDF

Image may contain: one or more people, eyeglasses and text

வையத்துள் வாழ்வாங்கு வாழ்ந்து, வானுறையும் தெய்வத்துள் மட்டுமல்ல, எம் எல்லோர் உள்ளங்களிலும் எண்ணங்களிலும் நீங்காத இடம் பெற்ற எம் ஊர் பெரியவர் திருஅழகரத்தினம் ஐயா அவர்களின் நினைவு மீட்பு இப்பகிர்வு.

எம் சமூகத்தின் குறைகளை தாங்கும் தூணாகவும், நிறைவுகளை பறை சாற்றி ஊரின் பெருமைகளை அடையாளப்படுத்தும் நிறை தீரனாகவும் திகழ்ந்தவர் அமரர் அழகர் ஐயா அவர்கள். தொல்காப்பியம் கூறிநிற்கும், தலைவனாகிய ஆடவன்மேல் அமைவன என்ற இரண்டு பண்பின் தொகுதிகளான “பெருமையும் உரனும் ஆடூஉ மேன” இற்கு முற்றும் சொந்தக்காரர்.

அமரர் ”அழகர்”. நெடியதோற்றமும், கூரிய விழிகளும், குமிண் சிரிப்பும், பவளம் போல் மேனியிற் பால்வெண்ணீறும், கூடிய புறத்தோற்றத்திலும், முகத்தினூடு தெரியும் அகத்தோற்றத்திலும், மற்றோர்கள் கண்டவுடன் எழுந்து நின்று மரியாதை செலுத்தும் வசீகரத்தினை இயற்பிற் கொண்டவர் ஐயா அவர்கள்,

நற்குணமும், நல்லறிவும், அனுபவமும், விவேகமும், தீர்கதரிசனமும், ஆன்மீக அறிவும் மிக்க ஒரு சமூகத் தொண்டன். வெண்கலத்தின் ஓசை மிகுவது போல்புல்லியர் ஆர்ப்பரிக்க, வெள்ளிக் கலத்தின் ஓசை மிதமாவது போல் சிற்றுணர்வோர் சிலுசிலுக்க, பொன் கலத்தில் உண்டாகா ஒலி போல் முற்றுணர்வோர் ஒன்றும்மொழியாது அமைதியாக இருப்பர்.

பெருமகனார், முற்றுணர்வோர் தோற்க, முழு நிலையான அறிவிற்றனயன் தளம்பாத நிறைகுடம். ஆர்பரிப்பற்ற செயல்வீரன். நிதானமான சொல்வேந்தன். வாழ்வியலின் நுண்ணிய நயங்க ள் முற்றும் தன்னகத்தே இயற்பிற் கொண்ட பெரு மகனின் இழப்பு, எம் சமூக உறவுகளுக்கு ஒப்பற்ற துயர்.

அவர் இளைஞனாக இருந்த காலத்தில், தனது நண்பர்களுடன் இணைந்து மிகுந்த சிரமங்களின் மத்தியில் அம்பாள் சனசமூக நிலயத்தை அமைத்து, அங்கு கிராம முன்னேற்றச்சங்கம், இந்து இளைஞர் இயக்கம், மாதர் சங்கம் மற்றும் ஆங்கில, தமிழ் நூல்களைக் கொண்ட நூல் நிலையம் என்பன இயங்க முன்னோடியாக திகழ்ந்தார்.

ஊரின் மத்தியில் அமைந்துள்ள முத்துமாரி அம்பாள் ஆலயத் திருப்பணி வேலைகள் முடங்கிக் கிடந்த நேரம், அதன் தேவைகளில் அதீத கவனம் கொண்டவராக, பெரும்சிரமங்கள் மத்தியிலும் திருப்பணி சபை ஒன்றை நிறுவி, அதனூடு, ஆலயம் புனர்நிர்மாணம் செய்யப்பெற்று. புதுப் பொலிவுடன் காட்சியளிக்க கண்டார் .

உட் புறப் பூசல்கள்காரணமாக இவ்வாலயம், 1976 ம் ஆண்டு பூட்டப் பெற்று இருந்த காலத்தில், இரு பெரும் முரண் அணிகளாக பிளவு பட்டு இருந்த திருப்பணிச் சபையினரையும், ஆலயபூசகர்களையும் சமாதானமாக்கி, ஆலயத்தினை மீண்டும் திறந்து, பூசைகள் மற்றும் திருப்பணிகள் செவ்வனே நடைபெற அயராது முயன்றிருந்தார்.

பூசாரிமார் சார்பில்என்னையும், மறைந்த நலன்விரும்பியும், சமாதான விரும்பியுமான அமரர் சின்னையா பொன்னுத்துரை அவர்களையும் அழைத்து கலந்தாலோசித்தபின், தானே சமாதானதூதுவனாக திருப்பணிச் சபையினரிடம் சென்று பூசாரிமாரின் விருப்பத்தை தெரிவித்து அவர்களின் சம்மதம் பெற முயன்றார்.

இருப்பினும், கற்றறிந்து, சமூகப் பொறுப்பில் தீர்க்கமான நிலைகளில் இருந்தோருக்கும் சாமான்ய சமூகத்திற்கும் புரிதல்களில் இருந்த அகண்ட இடைவெளியும், பிடிவாத மன இறுக்கங்களும், இவரது விடா முயற்சியை, அந்த கால கட்டதத்தில் நிறைவேற்றாத தடை முட்களாக இருந்துவிட்டன, இருந்த போதிலும், அதிலிருந்து சற்றும் மனம் தளராதவராக, பக்கச் சார்பற்ற, பொறுப்பான, மனுதர்ம சாத்திர வழி முயன்று கொண்டே இருந்து, ஒரு கட்டத்தில் அவரது உயர் நோக்கங்கள் நிறைவேறக் கண்டார்.

எனது இள பராயக் காலங்களில் (1960-1970), அவர் திருமணமாகி மனைவி மக்களுடன் வாழ்ந்த குடும்ப சுமையிலும் , நேரம் கிடைக்கும் பொழுதெல்லாம்; அம்மன்கோவில் முற்றத்திற்கு வரத் தவறுவதும் இல்லை. வந்தால் எங்களுடன் அளவளாவி எமக்கு அறிவு சார்ந்த தூண்டுதல்களை விதையாது வீடு செல்வதும் இல்லை.

தாம்அறிந்தை மற்றவர்களிடம் கேள்விகள் கேட்டு கேட்டு எம்மை சிந்திக்க தூண்டி பின் விளக்கம் சொல்லி, எமது அறிவுத்தேடலை உந்தச்செய்த உத்தமர். அவர்தம் கூறிய புத்திமதிகள் மற்றும் காட்டிச்சென்ற அறவழி இப்பொழுதும் எம் வாழ்வியலில் அழியாத சாட்சிகளாக எதிரொலிக்கின்றன.

அமரர் அழகரத்தினம் ஐயா அவர்களின் கல்வியறிவும், உயர்தக இயல்பாற்றல்களும், சுங்க திணைக்கழத்தில் ஆரம்ப நிலை உத்தியோகத்தராக இணைத்தது. அவரது நேர்மை,அறிவு, ஆற்றல் பணிவு, விவேகம் போன்ற நற்குணங்கள் சுங்கத் திணைக்கழகத்திற்கு அரும்பெரும் சொத்தாக அமைந்தது, செவ்வனே, சிறப்பியல்புச் சேவை நிமித்தம் பதவிஉயர்வுகள் பெற்று, சுங்க இலாகா பிரதிப் பணிப்பாளராக உயர்ந்த பதவியை வகித்து, ஓய்வு பெற்றார்.

ஐயா அவர்களுக்கு ஆன்மீக அறிவும், தெவீக சக்தியும் பரம்பரையாக வந்த சொத்து. முருகப்பெருமானிடம் அமைந்த கட்டுக்கடங்காத பக்தி நிமித்தம், அருணகிரிநாதர்அருளிச் செய்த ”கந்தர் அநுபூதி” என்னும் தோத்திரத்தில் மறைந்துள்ள ஆழமான கருத்துக்களை மிக நுட்பமாக ஆராய்ந்து, “அநுபூதிச் செல்வன்” என்னும் நூலில் பதிப்பித்து, ஓய்வு பெற்ற அதிபரும், அமரருமான மதிப்பிற்குரிய சண்முகரத்தின சர்மா அவர்கள் மூலம் காலையடியில் அமைந்துள்ள ஞானவேலாயுதர் ஆலயத்தில் வெளியிட்டு தமிழுக்கும் சைவத்திற்கும் பெருமை சேர்த்தார்.

அத்துடன் திருமுறைகளின் தாற்பரியம் என்னும் நூலையும் பதிவிலிட்டு வினியோகித்தார். இவ் நூல்களில் குறிக்கப்பெற்ற சில விடயங்களில், பொருள் விளக்கம் வேண்டி வினவிய பொழுது, அவர் தெரிவித்ததாவது, புத்தகத்தில் இடம்பெற்ற சில பொருளடக்கம், தனது இயல்புகளுக்கும் அப்பாற்பட்டது என்றும், அவற்றை நிறுவியது தன்னோடு பொருதிய தமிழ் கடவுள் முருகப் பெருமானின் அமானுசிய அனுக்கிரகமேயன்றி வேறேதும் இல்லை என்றார்.

அவை மட்டுமன்றி; ஜோதிட சாஸ்திரத்திலும் வித்தகராக திகழ்ந்தார். அண்மைக் காலம் வரை சோதிட வல்லுணர்களில் பெயர் குறிப்பிட்டு சொல்லும் அளவிற்கு அவர் முதன்மையாளராகவும் விளங்கினார்.

ஐயா அவர்களின் கல்வியறிவும், ஆற்றலும் சுங்க திணைக்கழத்தில் ஆரம்ப நிலை உத்தியோகத்தராக இணைத்தது. அவரது நேர்மை, அறிவு, ஆற்றல் பணிவு, விவேகம்போன்ற நற்குணங்கள் சுங்கத் திணைக்கழகத்திற்கு அரும்பெரும் சொத்தாக ஆக அமைந்தமையால் பதவி உயர்வுகள் பெற்று சுங்க திணைக்கழக பிரதிப் பணிப்பாளராகஉயர்ந்த பதவியை வகித்து ஓய்வு பெற்றார்.

இத்துணை பெருமைகளையும் தன்னகத்தே கொண்ட எம்மூர் பெருமகன் வாழ்ந்த காலத்தில் நாமும் வாழ்ந்தோம் என்பதனை புருவம் உயர்த்தி சொல்வதில் பெருமை கொள்கின்றோம்.

பெரியார் அமரர் அழகரத்தினம் ஐயா அவர்கள் பெருமையையும், புகழையும் பெற்றுக் கொள்ள இவ்வுலகில் அவரை சரியான முறையில் வழிநடத்திய அந்த ஜீவாத்மா, பொறிவழிச் செல்லாது, பஞ்சமா பாதகங்கள் புரியாது, அறநெறிவழி நின்று நற்செயல்கள் புரிந்ததினால் அந்த ஜீவாத்மாவை பீடித்திருந்த கன்மவினைகள் நீக்கி பரிசுத்த ஆன்மாவாகி பரமாத்மாவுடன் இணைந்து மோட்ச நிலை அடைய வேண்டும் என்பதே நியதி.

பெரியார் அமரர் அழகரத்தினம் ஐயா அவர்களை மதிப்போடும், மரியாதையோடும் இவ்வுலகில் வாழ்வாங்கு வாழ வைத்த அந்த ஆத்மா வானுறையும் தெய்வத்துள்வைக்கப்படும் என்ற குறள் மொழிக்கு இணங்க; பரமாத்மாவுடன் இணைந்து மோட்ச நிலை அடைய நாமும் இறைவனை பிரார்த்திப்போமாக.

அந்த நன்நோக்காளர், உயர் பண்பாளர் வாழ்ந்த காலத்தில் நாமும் வாழ்ந்தோம் என்பதனை எண்ணி பெருமை கொள்கின்றோம்.

அன்னாரின் ஆத்மா மோட்ச நிலை அடைய நாமும் இறைவனை பிரார்த்திப்போமாக.

ஓம் சாந்தி! ஓம்சாந்தி!! ஓம் சாந்தி!!!.
நன்றி, வணக்கம்

கணபதிப்பிள்ளை கனகரத்தினம் – பணிப்புலம்

"பணி செய்வதே பணி" பணிப்புலம் அம்பாள் சனசமூக நிலைய கிராம முன்னேற்ற சங்கம் - 70ம் ஆண்டு நிறைவு விழா

E-mail Print PDF

Image may contain: 2 people, people sitting

பணிப்புலம் வாழ் மக்கள் பரம்பரை பரம்பரையாக இறை பணிக்காகவே தம்மை அர்ப்பணித்தவர்கள். வைகறையில் துயில் எழுந்து முதற் பணியாக மொட்டறாது மலர் பறித்து, பூமாலை புனைந்து இறைவனை அலங்கரித்து, பூஜையின் போது சங்குநாதம் செய்து, பண்ணோடு பாமாலை பாடி "இறைவனை பணி செய்வதே தம் பணி" என இன்றும் பணி செய்து வருகின்றார்கள். அவ்வூரில் பிறந்தமையால் நாமும் பெருமை அடைகின்றோம்.

தேவை எங்கு தேவைப்படுகின்றதோ அங்கு அதை பெற்றுக் கொடுப்பதே சேவை. எதிர் பார்க்காத நேரத்தில் தம் தேவையை பெற்றுக் கொடுப்பதும் சேவைதான். தேவை ஏற்படாத இடத்தில் சேவைக்கு வேலையில்லை.

சேவை-பணி என்பது எல்லோராலும் சுலபமாக செய்யக்கூடிய ஒன்றன்று. அதற்கு பல அற்பணிப்புகள், நற்பண்புகள், வசதிகள் தேவை. சேவை செய்வதற்கு மற்றைய உயிர்களிடத்து அன்பு, கருணை, மனிதநேயம் நிறைந்தவர்களாக இருத்தல் அவசியம். மனித குலத்தில் மாணிக்கங்களாக திகழ்கின்றவர்களில் மட்டுமே இவ் ஒளிக் கீற்றுகள் பிரகாசிக்கின்றன.

சேவை என்பது மானிட வாழ்க்கைக்கு இன்றியமையாத ஒன்றை இல்லாதவர்களுக்கும், அது தேவைப் படுகின்றவர்களுக்கும் ஈதல் அல்லது அதனை கிடைக்கச் செய்தல் என பொருள் பெறும். ஈகை என்பது தன் நலம் கருதாது பெறுபவர் நலன் கருதி வழங்குவதாகும். கொடுத்தல் என்பது ஈகையில் இருந்து வேறு படுகின்றது. உதவி செய்பவர் பெற்றவரிடம் இருந்து அதற்கு பதிலாக வேறு ஒன்றை எதிர் பார்த்துச் செய்வதாகும். இதனை

"வறியார்க்கொன்று ஈவதே ஈகைமற் றெல்லாம்
குறியெதிர்ப்பை நீர துடைத்து." என வள்ளுவர் கூறுகின்றார்..


இல்லாதவர்க்கு வழங்குவதே ஈகைப் பண்பாகும். மற்றவர்களுக்கு வழங்குவது என்பது ஏதோ ஓர் ஆதாயத்தை எதிர்பார்த்து வழங்கப்படுவதாகும்.

சாதி, மதம், குலம், இன பேதம் காட்டாது பெற்றோரால் கைவிடப்பட்ட பிள்ளைகள், பிள்ளைகளால் கைவிடப்பட்ட பெற்றோர், யாருமற்ற அநாதைகள், காசநோய் மற்றும் குஷ்டரோகங்களால் அவதிப்பட்டோரை நாடிச் சென்று அவர்களுக்கு தஞ்சமளித்து அவர்களின் பசியையும், பிணியையும் போக்கி தாயார்போல் உடன் இருந்து சேவை செய்த அன்னை திரேசா அம்மையாரின் சேவையும் தேவையானவர்களுக்கு வழங்கப்பெற்ற ஒரு மகத்தான பணியே.

இல்லறத்தில் நல்லறம் செய்து இப் பிறப்பின் நோக்கத்தை அடைய விரும்பும் ஒவ்வொருவரும் "அன்பும் அறனும் உடைத்தாயின் இல்வாழ்க்கை பண்பும் பயனும் அது" என்ற வள்ளுவன் கூற்றிற்கு அமைய இல்வாழ்க்கை பண்புடையதாகவும், பயனுடையதாகவும் விளங்குவதற்கு அன்பான உள்ளமும் அதையொட்டிய நல்ல செயல்களும் தேவை.

இங்கே அன்பு என்ற வார்த்தையையின் பின்னால் பல நற்பண்புகள் அடங்கி இருக்கின்றன. அன்பு இருக்கும் இடத்தில் பரிவு, இரக்கம் இருக்கும், இவை இரண்டும் இருக்கும் இடத்தில் பணிவு இருக்கும், இவை அனைத்தும் நிறைந்த இடத்தில் சேவை-பணி இருக்கும். பணி செய்யும் போது அறன் தானாக வந்து சேருகின்றது. எனவே இவ் மானிடப் பிறப்பின் பண்பும், பயனும் அதுவாகி விடுகின்றது.

1945ம் ஆண்டளவில் எம்மூரில் வாழ்ந்து கொண்டிருந்த (இளையோர்) பள்ளிப் படிப்பு முடித்தோரும், பல்கலைக் கழகம் முடித்தோரும், படித்துக் கொண்டிருந்தோரும், பெரியோர்களும் முதலில் புதினப் பத்திரிகைகள் வாசிப்பதற்காக வாசிகசாலை ஒன்றை அமைத்தனர். அதன் பின்னர் ஊர் மக்களின் ஒத்தாசையுடன்; முத்தமிழும், சைவமும், தமிழர் பண்பாடும், கலாச்சார விழுமியங்களும் வருங்கால எமது சந்ததியினர் மத்தியில் வளர்ப்பதற்காக, விரிவாக்கம் அடைந்து வளர்ந்த்தே “அம்பாள் சானசமூக நிலைய கிராம முன்னேற்றச் சங்கமாகும்.

அம்பாள் சனசமூக நிலைய கிராம முன்னேற்றச் சங்கம் கடந்த 70 வருட காலமாக செய்த நற்பணிக்கு கிடைத்த வெற்றியை ஊர்மக்கள் அனைவருடனும் கொண்டாடும் இந் நந்நாள் ஊரிலும், எமது சமூகத்திலும் பொன் எழுத்துகளால் பொறிக்கப்பெற வேண்டிய பொன்நாளே.

இந் நன்நாளில் அம்பாள் சனசமூக நிலையத்தை உருவாக்கி, வளர்த்தெடுத்த எம்மூர் பெருமக்களுக்கும் நன்றி கூறுகின்றோம்.

ஆக்கம்: கணபதிப்பிள்ளை கனகரத்தினம்
(ஓய்வு பெற்ற கணினி வலை பின்னல் இணைப்பு பரிபாலகர்)

பணிப்புலம், பண்டத்தரிப்பு

பணிப்புலம் கிராமமும் முத்துமாரி அம்பாள் வழிபாடும் - ஆய்வு செய்தவர்: ஆ. த. குணத்திலகம் ஓய்வு நிலை ஆசிரியர்

E-mail Print PDF

ஒரு ஆய்வுக் கட்டுரை எழுதுவதில் எவ்வளவு சங்கடங்கள் ஏற்படும் என்பதை நான் நன்கு அறிவேன். இங்கு பல விமர்சனங்களும் கேள்விகளும் எழலாம். எனினும் கேள்விகள் பிறந்தாலே உண்மையும் தெளிவும் கிடைக்கும். இதை அடிப்படையாகக் கொண்டே இவ் ஆய்வினை எழுதத் துணிந்தேன். எந்த விமர்சனங்களையும் ஏற்கத் துணிந்து கொண்டே எழுத முற்படுகின்றேன். எனவே இங்கு காணப்படும் தவறுகளைச் சுட்டும் போது அவற்றை ஏற்கவும் தயாராய் உள்ளேன் என்பதையும் தெரிவித்துக் கொள்கிறேன் .

சைவக் கிராமம்:
பணிப்புலம் கிராமம் ஒரு பூரண சைவ சமயிகள் வாழும் கிராமமாகும். அமெரிக்க மிசனரி மதம் பரப்பும் காலத்தில் இங்குள்ள விரல் விட்டு எண்ணக்கூடிய ஒரு சில குடிகள் மதம் மாறியது துரதிஸ்டமே. இருந்தும் இன்றும் பணிப்புலம் ஒரு பூரண சைவக் கிராமமாகவே இருக்கின்றது.

இக் கிராமம் மிகப் பழம் காலத்தில் தென் இந்திய வர்த்தகர்களான செட்டிமார் குலத்தின் பாரம்பரிய பிரதேசமாக இருந்ததாக கர்ண பரம்பரை வரலாறு கூறுகின்றது. இது இங்குள்ள பல ஆலயங்கள் அவர்களாலேயே அமைக்கப் பட்டுப் பரிபாலிக்கப் பட்டு வந்ததன் மூலம் அறிய முடிகிறது.

பணிப்புலம் என்னும் கிராமம் யாழ்ப்பான ராச்சியத்தை ஆரம்பித்து வைத்த முதல் மன்னன் விஜய காலிங்க (கூழங்கை )ஆரியன் காலத்தில் ஆரம்ப மானதெனக் கருத இடமுண்டு. இவன் இந்தியாவிலிருந்து இங்கு வந்த போது யாழ்ப்பாணத்தில் தமிழ்க் குடிகள் குறைவாக இருந்ததால் தனது ஆட்சிக்குத் தேவையான பல தொழில் சார் குலத்தவரை இங்கு அழைத்து வந்ததாக யாழ்ப்பாணச் சரித்திரம் கூறுகிறது. அவர்களில் ஒரு பகுதியினர் சைவ ஆலயங்களைப் பரிபாலிக்கவென இங்கு அழைத்து வரப்பட்ட ”வீர சைவ குலத்தவர்” என்பது யாழ்ப்பாணச் சரித்திர வாயிலாக அறிய முடிகிறது .

வீர சைவர்:
இந்தியாவில் சைவம் இடத்துக்கிடம் சில வேறுபாடுகளுடன் கடைப் பிடிக்கப் படுகிறது. இந்தியாவின் வடபகுதியில் காஸ்மீர் சைவம் எனவும், மைசூர் மாநிலமான கன்னடத்தில் "வீர சைவம்” எனவும், தமிழ் நாட்டில் சித்தாந்த சைவம் எனவும் வழங்கப்பட்டு வருகிறது. இந்த மைசூர் மாநில வீர சைவ குலத்தவரே தமிழ் நாடுமூலம் யாழ்ப்பாணம் வந்துள்ளதாக ஊகிக்க முடிகின்றது.

யாழ்ப்பாண மன்னன் காலிங்க ஆரியன் "வீர சைவன்" எனவும் அவன் வீர சைவர்களை இங்கு அழைத்து வந்ததாகவும் யாழ்ப்பாணச் சரித்திர நூல்களான "யாழ்ப்பாண மன்னர் பரம்பரை", "ஈழத்தவர் வரலாறு" என்பவற்றில் கலாநிதி. க. குணராசா அவர்கள் கூறியுள்ளார். எனவே இக்காலத்தில் வந்த வீர சைவர் யாழ்ப்பாணத்தின் பல்வேறு பகுதிகளிலும் குடியேறி இருக்கலாம். அவற்றில் ஒரிடமே பணிப்புலம் ஆக இருக்கலாம்.

பணிப்புலம்:
பணிப்புலம்    என்னும்    இப் பெயரை நாம் சற்று ஆழமாக ஆராய வேண்டியுள்ளது. பணி என்பது தொண்டு எனப் பொருள்படும். புலம் என்பது இடம் ஆகும். எனவே பணி + புலம் = பணிப்புலம் ஆகும். அதாவது தொண்டு செய்வோர் வாழும் இடமே "பணிப்புலம் " என்பதாகும். இதனாலேயே இவ்விடம் "பணிப்புலம்" என அழைக்கப் பட்டதாகக் கூறுவர். இவ்விடம் முற்காலத்தில் ஒரு சிறிய இடமாக இருந்திருக்கலாம். அதாவது பணிப்புலம் அம்பாள் ஆலயத்தைச் சூழவுள்ள சில குடிகளே "பணிப்புலம்" வாசிகளாக இருந்துள்ளனர் .

பண்டாரம்:
பணிப்புலம் என்பதை இன்னும் விளக்குகையில் இங்கு வாழ்ந்த வாழும் குலமான "பண்டாரம்" என்னும் குலத்துக்கும் இந்த இடத்துக்கும் பெயரில் நெருங்கிய தொடர்பு இருப்பதைக் காணலாம். "பண்டாரம்”, "பணிப்புலம்" ஆகிய இரண்டு பெயரும் ஒன்றோடொன்று தொடர்புடையனவாகும். "பண்டாரம்" என்ற சொல்லைப் பிரிப்போமானால், பண் -இசை, ஆரம் -மாலை என்பதாகும். பண் +ஆரம் =பண்ணாரம் என்பது இசை மாலையால் இறைவனை அர்ச்சிப்பவர்கள் என்பது அர்த்தமாகும். பண்ணாரம் என்பது பிற்காலங்களில் மருவிப் "பண்டாரம்" ஆனது எனக் கொள்வாரும் உளர். இது அவர்களின்  தொண்டு வாழ்க்கையைக் குறிக்கும் காரணப் பெயராகும்.

சாதியமைப்பு சமைய சம்பிரதாயங்கள் கடுமையாக நிலவிய அக்காலத்தில் "பண்டாரம்" என்னும் குலத்தினர் ஒரு மிக உயர்ந்த நிலையில் வைக்கப் பட்டனர் . "பண்டாரம்" என்பது "சிவனடியார்" என்றும் அதனால் இவர்கள் சிவனடியார் பரம்பரை எனவும் மிகவும் மதிக்கப் பட்டனர் .

பண்டார வாரியம்:
முற்காலத்தில் ஆலயங்களில் இன்று பரிபாலன சபை இருப்பதுபோல் "பண்டார வாரியம்" என்னும் சபைகள் இருந்ததாகக் கூறப்படுகிறது. இவர்கள் ஆலயம் சம்மந்தமான சகல நடவடிக்கைகளையும் கவனித்து வந்தனர். "பண்ணவன்" என்பது பாடகன் என்னும் ஒரு பொருளையும் உடையது. எனவே பண்ணவன் என்ற சொல்லும் "பண்டாரம்" என்ற சொல்லுடன் ஒத்துப் போவதால் பண்ணவனும் பண்டாரமாகி இருக்கலாம் எனவும் ஊகிக்கலாம்.

இவர்கள் ஆலையங்களில் தொண்டு செய்வதும் ,பாமாலை பாடுவதும், பூமாலை புனைவதும், சங்கு நாதம் ஒலிப்பதும் என தொண்டுக் காரியங்களில் ஈடுபடுத்தப் பட்டனர். இதற்காக ஆலைய வருவாயில் ஒருபகுதி இவர்கள் குடும்ப வாழ்க்கைக்கு நன்கொடையாக வழங்கப்பட்டு வந்தது. மற்றும் ஆலைய உற்சவ காலங்கள் திருவெம்பாவை போன்ற புண்ணிய காலங்களில் ஊரூராகச் சென்று இசையுடன் திருமுறை ஓதுவதும் சங்கு ஊதுவதும், அதன் மூலம் கிடைக்கும் அன்பளிப்புகளும் இவர்களின் வாழ்க்கையை ஒட்டின .

பண்டாராத்தியன்:
"பண்டாரம் "என்பதற்கு இன்னுமொரு பொருள் கொள்ளப்படுகிறது. "பண்டாராத்தியன் "என்னும் சொல் மருவிப் "பண்டாரம் "என வந்ததாகவும் கொள்ள இடமுண்டு. பண்டு -பழைய, முற்கால என்பதாகும். ஆராத்தியன் -வீர சைவப் பார்ப்பனன். எனவே பண்டு +ஆராத்தியன் = பண்டாராத்தியன் என்பது பழைய அல்லது முற்கால வீர சைவப் பார்ப்பனன் என்பது ஒரு பொருளாகும். இதன்மூலம் "பண்டாரம் "என்னும் குலம் முற்காலத்தில் பிராமணரில் ஒரு இருந்தமை தெரிய வருகிறது. பின்னர் இக்குலம் தனியே பண்டாரம் என்னும் பெயரைப் பெற்றிருக்கலாம் .

முத்துமாரி அம்பாள் வழிபாடு:
முத்துமாரி அம்மனைக் குல தெய்வமாகக் கொண்டு இவர்கள் ஊரூராகச் சென்று முத்துமாரி அம்மன் வேடம் தாங்கி கரகாட்டம் ஆடி மக்களைப் பக்தி நெறிக்குட்படுத்தினர். அவ்வகையிலேயே பணிப்புலம் முத்துமாரி அம்மன் வழிபாடும் தோன்றியதாக அறிய முடிகிறது. இக் கருத்துக்கு வலுச் சேர்க்க அளவெட்டி என்னும் இடத்திலுள்ள தவளகிரி முத்துமாரி அம்மன் ஆலையம் இக்குலத்தவர்களாலேயே அமைத்து வணங்கப்படுவதைக் காணமுடிகிறது .

இன்னும் இவ் ஆலயம் இருக்கும் இடம் ஆரம்பத்தில் ஒரு பன்னைக் காடாக இருந்ததாகவும் இங்கு வாழ்ந்த மிகப் பழம் குடிமகன் ஒருவர் கனவின் நிமித்தம் (பூசாரி குடும்பம்) அவரால் இவ் ஆலயம் அமைக்கப் பட்டதாகவும் பணிப்புலம் முத்துமாரியம்மன் ஆலய வரலாறு கூறுகிறது.

...சைவ சமயத்தின் ஒரு இருண்ட காலம்:
இலங்கையில் போர்த்துக்கீசர் காலம் இங்குள்ள சமயங்களின் இருண்ட காலமாக இருந்தது. புத்த சமயமும் சைவசமயமும் அழிக்கப்பட்டு கிறிஸ்த்தவ சமயம் பரப்பும் ஒரு அடக்கு முறைக் காலமாக இருந்தது. கி. பி 1505 ல் இங்கு வந்த போர்த்துக்கீசர் தம் மதம் பரப்புவதற்காக பெரும் அட்டூழியங்களைச் செய்தனர். இவர்களின் ஆட்சி கி .பி .1505 -1658 வரை இங்கு நிலவியது. இவர்கள் தமது மதத்தை இங்கு வலிந்து பரப்பினர். தென்பகுதியில் பெருமளவில் மதம் மாறினாலும் தமிலராட்சிக் குட்பட்ட பகுதியில் இவர்கள் ஆட்டம் பலிக்கவில்லை. அப்போது யாழ்ப்பாண மன்னனாக இருந்த சங்கிலியன் தீவிர சைவப் பற்றுடையவன். இவனின் உறுதியான சமயப் பற்று இங்கு எளிதில் கத்தோலிக்கம் புகுத்த முடியாதிருந்தது. மன்னார் பகுதியில் சில போர்த்துகீச பாதிரிமார் வலுக் கட்டாயமாக ஆயிரக் கணக்கானோரை மதம் மாற்றிய செய்தியை அறிந்த சங்கிலி மன்னன் பாதிரிமார் உட்பட மதம் மாறிய அனைவரையும் சிரச்சேதம் செய்வித்தான்

ஆனால் தமிழரின் சாபக் கேடு, கூடப்பிறந்த குணம் அன்றும் விடவில்லை. சகோதரப் பூசல் துரோகம் சங்கிலியனையும் 1621 ல் யாழ் வீரமா காளியம்மன் கோயிலடியில் போர்த்துக்கீசருடன் நடந்த கடும் சமரின்போது காட்டிக் கொடுத்து சங்கிலியன் சிறை பிடிக்கப் பட்டு கொல்லப்பட்டான். சங்கிலியன் மரணத்துடன் யாழ்ப்பாணத் தமிழரசு அஸ்தமித்தது. போர்த்துக்கீசரின் கொடுங்கோலாட்சி ஆரம்பமானது .

இக் காலத்திலேயே யாழ்ப்பாணத்தில் தீவிர மதமாற்றம் இடம் பெற்றது. மதமாற்றம் மட்டுமல்லாது சைவ சமய ஒழுக்கங்களுக்குப் பெருந் தடைகள் விதித்தார்கள். சைவ ஆலையங்கள் இடிக்கப்பட்டு அக் கற்களைக் கொண்டே கத்தோலிக்க தேவாலயங்கள் அமைத்தனர். அக் காலத்தில் சைவர்கள் தமது சைவ வழிபாட்டுக் கருமங்களை மறைந்தே செய்து வந்தனர். திரு நீறணிதல் வாழைஇலையில் உணவுண்ணல் போன்ற பல சைவ முறைகளுக்குத் தடை விதித்தனர். இதனால் சைவர்கள் தமது வீட்டுக் காணிகளில் மர நிழல்களில் சூலம் வைத்தே வழிபட்டனர். ஆலயங்கள் இடிக்கப்படுவதால் அங்குள்ள விக்கிரகங்களை பூசகர்கள் கிணறுகள் குளங்கள் முதலியவற்றில் இட்டு மறைத்தனர்.

செட்டிமார் குலம் வெளியேற்றம்:
போர்த்துக்கீசரின் அட்டூளியத்தில் நடந்த இன்னு மொரு பாதகமான செயல் "பசுவதை ". அதாவது ஒவ்வொரு கிராமத்திலும் உள்ள போர்த்துக்கீச தளங்களுக்கு அக் கிராமத்திலுள்ள மக்கள் நாள் தோறும் ஒரு மாடு உணவுக்காக வழங்க வேண்டுமெனத் தளபதியால் கட்டளை பிறப்பிக்கப் பட்டது. இதை விரும்பாத ,செய்ய முடியாத சுத்த சைவ ஆசால சீலர்களான செட்டிமார் பலர் குடும்பம் குடும்பமாக நாட்டை விட்டு வெளியேறித் தமிழ் நாட்டில் குடியேறினர். யாழ்ப்பாணத் தமிழரசர் செல்வாக்கில் பெரும் நிலச் சுவான்தார்களாக வாழ்ந்தவர்கள் தம் நிலபுலங்கள் அனைத்தையும் இங்குள்ளவர்களுக்கு விற்றும் தங்களால் பரிபாலிக்கப்பட்ட இந்து ஆலயங்களுக்குத் தர்மமாக எழுதியும் இன்னும் சிலர் இந்தியாவிலுள்ள சிதம்பரம் ஆலயத்துக்குத் தர்மசாதனமாக எழுதியும் சென்றனர்.

அவர்கள் வாழ்ந்த இக் கிராமத்து இடங்கள் அனைத்தும் பின்னர் பணிப்புலம் என்னும் பெரும் கிராமமாக விரிவடைந்தது. போர்த்துக்கீசர் காலம் முடிந்து கி .பி .1658 ல் ஒல்லாந்தர் ஆட்சி ஏற்ப்பட்டது. இக் காலம் ஓரளவு மதச் சுதந்திரம் ஏற்ப்பட்டாலும் சலுகைகளுடன் மதம் மாற்றும் முயற்ச்சி நடைபெற்றது. இதன் பின் கி. பி  1796 ல் ஆங்கிலேயர் ஆட்சி ஏற்பட்ட போது முற்றாக மத சுதந்திரம் ஏற்ப்பட்டு சைவர்கள் மீண்டும் சைவ ஆலயங்களை அமைத்து மறைத்து வைக்கப் பட்ட விக்கிரங்களை வெளியே எடுத்து சைவ சமய நெறியுடன் வாழ்ந்தனர் .

பன்னைப் புலம் ---
இருண்ட காலமான போர்த்துக்கீசர் காலத்தில் சைவர்கள் விக்கிரகங்களை ஒழித்து வைத்த இடங்களில் ஒரு இடமாக குறித்த பன்னைப் பற்றை இருந்திருக்கலாம். நீண்ட காலங்களுக்குப் பின் பூசாரி கனகருக்கு அம்பாள் காட்சி கொடுத்திருக்கலாம். இதனாலேயே பன்னைப்புல அம்பாள் எனப் பட்டிருக்கலாம். பின்னர் இக் குலப் பெயருடன் இணைந்து பணிப்புலமாக மருவியதாகவும் கூறப் படுகிறது .

எப்படி இருப்பினும் "பணிப்புலம்"என்பதர்க்குக் கூறப்படும் வெவ்வேறு காரணங்கள் பணி செய்யும் குலத்தினர் வாழ்ந்த இடம் என்பது உறுதியாகின்றது. சாதிய அமைப்பு முறைகள் மாற்ற மடியும் இக் காலத்தில் "பண்டாரம் "என அழைக்கப்படும் இச் சமூகம் மீண்டும் "வீர சைவர்"என அழைக்கப் படுகின்றனர் என்றும் பணி செய்யும் குலம் வாழ்ந்த இடமே "பணிப்புலம்"என்பதும் முடிவாகும் .


ஆய்வு செய்தவர்
ஆ .த . குணத்திலகம்
ஓய்வு நிலை ஆசிரியர்
அகில இலங்கை சமாதான நீதிவான் .
சாந்தை, சில்லாலை .

முதியோர்கள் ”அறளை” பெயர்தலுடன் உயிர் வாழுதல்(LIVING WITH DEMENTIA)

E-mail Print PDF

”அறுபதில் அறளை பேரும்” என்பதும், ”நாற்பதில் நாய்க்குணம் வரும்” என்பதும் எம்முன்னோர் அனுபவத்தால் தந்த முதுமொழிகள்.  வயது அறுபதை தாண்டிவிட்டால் நரம்பு தளர்ச்சி உள்ளவர்களுக்கு ஞாபகமறதி ஏற்படலாம். அத்துடன் அவர்கள் வேறு நோயினால் பீடிக்கப் பெற்று வாழும் நிலை ஏற்பட்டுவிட்டால் நிலைமை மோசமடைகின்றது. ஒருமுறை கூற வேண்டியதை பலமுறை கூறியும், மற்றவர்களில் செயலில் வெறுப்பைக் காட்டியும், எதற்கெடுத்தாலும் எரிந்து விழுவதுமாக பயித்தியம் பிடித்தவர்கள்போல் இருப்பார்கள். இதையே இளையோர் அறளை பேருதல் என்கிறார்கள். டாக்ரர்கள் இது ஒரு பருவ வருத்தம் என்கின்றார்கள்.

  • «
  •  Start 
  •  Prev 
  •  1 
  •  2 
  •  3 
  •  4 
  •  5 
  •  6 
  •  7 
  •  8 
  •  9 
  •  10 
  •  Next 
  •  End 
  • »

Page 1 of 24