Saturday, Jul 22nd

Last update07:34:40 PM GMT

தலைப்புச் செய்திகள்:
You are here: பல்சுவை

மான் கராத்தே - திரை விமர்சனம்

E-mail Print PDF

லாஜிக்கோடு கதை சொல்வது ஒரு ரகம். லாஜிக்கே இல்லாமல் மசாலாக்களை மட்டுமே நம்பிக் கதை பண்ணுவது இன்னொரு ரகம். ‘மான் கராத்தே’ இரண்டாவது ரகம்.

வலுவான ஒரு முடிச்சின் அடிப்படையில் சங்கிலித் தொடர் திரைக்கதை அமைக்கும் ஏ.ஆர். முருகதாஸ் எழுதிய மிகப் பலவீனமான கதை இது.

பிரபல ஐ.டி. நிறுவனத்தில் வேலையிழக்கும் ஐந்து நண்பர்கள் (மூன்று ஆண்கள், இரண்டு பெண்கள்) அடுத்து என்ன செய்வது என்று யோசிக்கிறார்கள். அப்போது அவர்கள் கையில் சித்தர் ஒருவர் ஒரு செய்தித்தாளைக் கொடுக்கிறார். ஆறு மாதங்கள் கழித்து வரவிருக்கும் செய்தித்தாள் அது. அதில் ஒரு செய்தி இவர்களைப் பற்றியது. ராயபுரத்தில் வாழும் பீட்டர் (சிவகார்த்திகேயன்) மாநில அளவிலான குத்துச்சண்டைப் போட்டியில் சாம்பியன்ஷிப் வெல்கிறார். அதில் கிடைக்கும் பரிசுத் தொகையான 2 கோடியை, ஐந்து ஐ.டி. நண்பர்களுக்கும் அவர் கொடுப்பதாகவும் அந்தச் செய்தி சொல்கிறது.

இதில் உற்சாகமடையும் அவர்கள் பீட்டரைப் பிடித்து வந்து ஒப்பந்தம் போடுகிறார்கள். ஆனால் அவருக்கு பாக்ஸிங் என்றாலே என்னவென்று தெரியாது. இதனால் அவருக்குப் பயிற்சியாளரை ஏற்பாடு செய்கிறார்கள். தான் காதலிக்கும் யாழினிக்கு (ஹன்சிகா) குத்துச் சண்டை பிடிக்கும் என்பதற்காகப் பீட்டரும் ஒப்புக்கொண்டு தயாராகிறார்.

முதல் இரண்டு சுற்றுக்களில் ‘மான் கராத்தே’ என்ற உத்தியை (எதிராளி முகத்தில் குத்த வரும்போது விலகிக்கொள்வது) பயன்படுத்திச் சிவகார்த்திகேயன் வெல்கிறார். இறுதிப் போட்டிக்கு அவர் தகுதிபெறும்போதுதான் ஒரு உண்மை தெரிகிறது. பல ஆண்டுகளாக சாம்பியன்ஷிப் பதக்கத்தைத் தக்கவைத்திருக்கும் தொழில்முறை குத்துச்சண்டை வீரரின் பெயரும் பீட்டர் (வம்சி கிருஷ்ணா) என்பதே அந்த உண்மை.

நாம் ஒப்பந்தம் செய்ய வேண்டிய பீட்டர் இவர்தானோ எனக் குழம்பும் ஐடி நண்பர்கள் ராயபுரம் பீட்டரை என்ன செய்தார்கள்? தனக்குக் குத்துச் சண்டை தெரியும் என்று நினைத்துக்கொண்டிருக்கும் காதலிக்காக இறுதிப் போட்டியில் கலந்துகொண்டு ராயபுரம் பீட்டர் வெற்றிபெற்றாரா இல்லையா என்பதுதான் திரைக்கதை.

கதையாகப் பார்க்கும்போது சுவையாகத் தோன்றலாம். ஆனால் காட்சிகளாகப் பார்க்கும்போது தலை கிறுகிறுக்கிறது. நிஜ வாழ்க்கையில் நிகழ வாய்ப்பே இல்லாத சரடுதான் ‘மான் கராத்தே’ கதை.

சிவகார்த்திகேயன் ஏற்கனவே நடித்த எதிர்நீச்சலின் எதிர்மறை பிம்பம் இது. அதில் இருந்த முயற்சி, தன்னம்பிக்கை இரண்டையும் இழிவுபடுத்தும் விதமாக ஒரே நாளில் ஒருவன் குத்துச்சாண்டை வீரனாகி, பல ஆண்டுகளாக உழைத்துச் சாம்பியன்ஷிப் வென்ற ஒருவனை வீழ்த்துவதுபோலக் காட்டி, குத்துச்சண்டையையும் படம் பார்க்கும் ரசிகர்களையும் இழிவுபடுத்துகிறார் இயக்குநர்.

கதையின் முதன்மைக் கதாபாத்திரம் மட்டுமின்றி நாயகியின் அப்பா, ஐந்து ஐ.டி. நண்பர்கள், பயிற்சியாளராக வரும் ஷாஜி எனப் பல பாத்திரங்களும் பலவீனமாகவே இருக்கின்றன.

நடிப்பு, நடனம் இரண்டிலும் அடுத்த கட்டத்துக்கு நகர்ந்திருக்கும் சிவகார்த்திகேயன், டைமிங் சென்ஸைத் தவறவிட்டிருக்கிறார். மசாலாவை நம்பினோர் கைவிடப்படார் என்ற முடிவுடன் ஒரு புது இயக்குநர் (திருக்குமரன்) களம் இறங்கியிருப்பது ஏமாற்றமளிக்கிறது. ஹன்ஸிகா கொடுத்த வேலையைக் கச்சிதமாகச் செய்திருக்கிறார். காமெடியனாக வளர்ந்து வரும் சதீஷை வீணடித்திருக்கிறார்கள்.

படத்தில் நிமிர்ந்து உட்கார வைப்பவர் இசையமைப்பாளர் அனிருத் மட்டும்தான். ஆனால் பின்னணி இசையில் கொஞ்சம் அதிகமாகவே தட்டி அதைச் சராசரி ஆக்கிவிட்டிருக்கிறார்.

ராயபுரம் பீட்டருக்காக வெற்றியை விட்டுக் கொடுங்கள் என்று ரியல் பாக்ஸர் பீட்டரிடம் அவரது மனைவிச் சொல்கிறார். ‘உன்னை யாராவது கேட்டால் நான் விட்டுத் தருவேனா, அதே மாதிரிதான் பாக்ஸிங்கும்’ என்று உணர்ச்சிக்கரமாகப் பேசும் அவர், ராயபுரம் பீட்டரிடம், ‘உன் காதலியை விட்டுக்கொடு.. வெற்றியை விட்டுக் கொடுக்கிறேன்’ என்று வசனம் பேசுவது அருவருப்பான முரண்.

பெருங்கூட்டத்திடம் தர்ம அடி வாங்கிய பின், முகத்திலும், மூக்கிலும் ரத்தம் வடிய "மடங்க மடங்க அடிக்கிறதுலகூட இப்படியெல்லாங்கூடவா யோசிப்பாய்ங்க..! என்ற வடிவேலுவின் நிலைதான் ரசிகர்களுக்கும்.

”ஜிகிர்தண்டா” ஏப்.25 வெளியாகிறது

E-mail Print PDF

பீட்சா இயக்குனர் கார்த்திக் சுப்பாராஜின் இரண்டாவது படம் ஜிகிர்தண்டா இந்த மாதம் 25 ஆம் தேதி வெளியாகிறது.

ஒரு கோடிக்குள் எடுக்கப்பட்ட பீட்சா தமிழ் சினிமாவின் போக்கை சிறிது மாற்றியது என்று சொல்லலாம். அதன் ரீமேக் ரைட்ஸ் பெரும் தொகைக்கு விற்கப்பட்டது. மினிமம் பட்ஜெட்டில் நிறைவான படத்தை தர முடியும் என்பதை பீட்சா நெத்தியடியாகச் சொன்னது.

பீட்சாவை இயக்கியவரின் படம் என்பதால் ஜிகிர்தண்டாவை ருசிக்க அனைவரும் காத்திருக்கின்றனர். உண்மையில் இந்த ஸ்கிரிப்டைதான் கார்த்திக் சுப்பாராஜ் முதலில் எழுதினார். என்னுடைய பட்ஜெட் ஒரு கோடி என்று தயாரிப்பாளர் சி.வி.குமார் சொன்னதால் ஜிகிர்தண்டாவை ஒதுக்கி வைத்து பீட்சா கதையை எழுதி படமாக்கினார்.

ஜிகிர்தண்டாவில் சித்தார்த், லட்சுமி மேனன், சிம்கா, கருணா உள்பட பலர் நடித்துள்ளனர். வித்தியாசமான ஆக்ஷன் படம். ட்ரெய்லர் ரசிகர்களிடம் நல்ல வரவேற்பை பெற்றுள்ளது.

ஏப்ரல் 25 படத்தை வெளியிடுவதாக அதிகாரப்பூர்வமாக அறிவித்துள்ளனர்.

உதட்டுடன் உதடு சேர்த்து முத்தக்காட்சியில் நடிக்க தயார் - நடிகை லட்சுமி மேனன்

E-mail Print PDF

உதட்டுடன் உதடு சேர்த்து எல்லா கதாநாயகர்களுடனும் முத்தக்காட்சியில் நடிக்க தயார் என்று நடிகை லட்சுமி மேனன் கூறினார்.

பேட்டி
நடிகர் விஷாலின் சொந்தப்பட நிறுவனமான விஷால் பிலிம் பேக்டரிÕயும், யு டி.வி. நிறுவனமும் இணைந்து Ôநான் சிகப்பு மனிதன் என்ற படத்தை தயாரித்துள்ளன. இந்த படம் விரைவில் திரைக்கு வர இருக்கிறது.

இதையட்டி நடிகர் விஷால், நடிகை லட்சுமி மேனன் ஆகிய இருவரும் சென்னையில் இன்று இரவு நிருபர்களுக்கு பேட்டி அளித்தார்கள். அப்போது விஷால் கூறியதாவது:

நான் சிகப்பு மனிதன் படத்தில் பரபரப்பான 2 காட்சிகள் உள்ளன. அதில் ஒன்று கடலுக்கு அடியில் நானும், லட்சுமி மேனனும் நடித்த காட்சி, இன்னொன்று உதட்டுடன் உதடு சேர்த்து முத்தம் கொடுத்த காட்சி. இது, ஜேம்ஸ்பாண்ட் படத்தில் வரும் முத்தக்காட்சி போல் இருக்குமென்று எதிர்பார்க்க வேண்டாம். கதையோடு வருகிற முத்தக்காட்சி இது. இவ்வாறு விஷால் கூறினார்.

முத்தக்காட்சியில் நடிக்க தயார்

நடிகை லட்சுமி மேனனிடம், விஷாலுடன் மட்டும்தான் முத்தக்காட்சியில் நடிப்பீர்களா? அல்லது எல்லா கதாநாயகர்களுடனும் முத்தக்காட்சியில் நடிப்பீர்காளா? என்று நிருபர்கள் கேட்டார்கள்.

அதற்கு பதில் அளித்து லட்சுமி மேனன் கூறியதாவது:

கதைக்கு தேவைப்பட்டால் எல்லா கதாநாயகர்களுடன் உதட்டுடன் உதடு சேர்த்து முத்தக்காட்சியில் நடிக்க தயார். மேற்கண்டவாறு லட்சுமி மேனன் கூறினார்.

கேரள நாட்டிளம் பெண்களுடனே - திரை விமர்சனம்

E-mail Print PDF

மலையாள பெண்ணைக் காதலித்து தோற்றவர் அப்பா ஞானசம்பந்தம். ஆனாலும் கேரள கலாசாரம் மீதும் பெண்கள் மீதும் அதீத ஆசை. தன் மகனுக்கு உன்னி கிருஷ்ணன் என்ற பெயர் வைத்து கேரள கலாசாரத்துடன் வளர்க்கிறார். தனக்கு மலையாள பெண்குட்டிதான் மருமகளாக வரவேண்டும் என்பதற்காக மகனை கேரளாவுக்கு அனுப்பி வைக்கிறார்.

அங்கு திருமண தகவல் நிலையம் நடத்தும் காளியிடம் சேர்கிறார் அபி. அங்கு காயத்ரியை கண்டு பிரேமிக்கிறார். அவரது தோழி ஒருவருக்கு உதவப்போன இடத்தில் அறிமுகமாகும் அபிராமியும் அபியை பிரேமிக்கிறார், இதற்கிடையில் அபியின் அம்மா ஊரில் போலீஸ் இன்ஸ்பெக்டர் தீக்ஷிதாவை பேசி வைத்திருக்கிறார். மூவரில் யாரை அபி திருமணம் செய்கிறார் என்பதை காமெடி கெட்டிமேளம் கொட்டி சொல்கிறார்கள். காமெடி கதை வழியே கேரள கலாசாரத்தையும், கேரள-தமிழ்நாட்டுக்குமான உறவையும் சொன்னவிதத்தில் கவனம் பெறுகிறார் இயக்குனர்.

கதையின் நாயகன் அபி ஹீரோவுக்குரிய அங்க லட்சணங்களுடன் இருக்கிறார். ஆங்காங்கே நன்றாக நடித்திருந்தாலும் காமெடியிலும், காதலிலும் புகுந்து விளையாட வேண்டிய காட்சியில் தேமே என்று வந்து போகிறார். அவரது நண்பராக வரும் காளி காமெடிக்கு கியாரண்டி கொடுக்கிறார். கடைசி வரை ஒருவர் தினமும் வந்து அடித்துவிட்டு போவதும், அதற்கு ஒருவர் காரணம் கேட்கும்போது, அதை சொன்னா இந்த ஊரே அடிக்கும். அதுக்கு இவனே அடிச்சிட்டு போகட்டும் என்று சொல்லும் காட்சியில் சிரிப்பில் மிதக்கிறது தியேட்டர். ஞானசம்பந்தனின் தமிழ் கலந்த மலையாள பேச்சு ரசிக்க வைக்கிறது. கணவனின் கேரள மோகத்தை வெறுக்கும் மனைவியாக ரேணுகா கவர்கிறார். மூன்று நாயகிகளில் முதலிடம் பெறுகிறவர் காயத்ரி. முல்லை பெரியாரா கேட்டேன். உன் முல்லை சிரிப்பைத்தானே கேட்டேன்...

என்கிற வைரமுத்து வரிகளுக்கேற்ப அழகாக இருக்கிறார். நன்றாக நடிக்கவும் செய்கிறார். போலீசாக வரும் தீக்ஷிதாவும் அழகாக இருக்கிறார். நடிக்க வாய்ப்பு குறைவு. தனது படம் என்பதால் பாடலிலும், பின்னணி இசையிலும் தனி கவனம் செலுத்தியிருக்கிறார் எஸ்.எஸ்.குமரன். காமெடி படம் என்றாலும் பின்னணி இசை ரகிக்க வைக்கிறது. யுவாவின் ஒளிப்பதிவு கேரளாவின் அழகை அள்ளி வந்து கொட்டுகிறது.

அபியை மாறி மாறி கடத்தும் தாதா கும்பலின் சலம்பல்களும், கிளைமாக்ஸ் கலாட்டாவும் நாடகத்தனமாவை. ஒவ்வொரு காட்சியிலும் சிரிக்க வைக்க வேண்டும் என்பதில் காட்டியிருக்கும் முனைப்பை மற்ற விஷயங்களிலும் காட்டியிருந்தால் கேரள பெண்கள் இன்னும் கூடுதலாக ரசிக்க வைத்திருப்பார்கள்.

குக்கூ - திரை விமர்சனம்

E-mail Print PDF

பார்வையற்ற இளைஞர் தினேசுக்கு, பார்வையற்ற மாளவிகா மீது காதல். மாளவிகாவுக்கு பார்வையுள்ள இளைஞன் மீது காதல். இது தினேஷூக்குத் தெரியவரும்போது, தன் காதலை கண்ணீரால் அழித்து விடுகிறார். ஆனால் மாளவிகாவின் காதல் தோற்றுவிட தினேஷ், மாளவிகாவின் காதல் பூத்து, காய்த்து, கனியாகிறது. மாளவிகாவின் அண்ணன், அவளை தன் கூட்டாளி ஒருவனுக்குத் திருமணம் செய்து வைக்க முயற்சிக்கிறான். தினேஷை அடித்து நொறுக்கி ஆஸ்பத்திரியில் படுக்க வைக்கிறான். மாளவிகா கண்காணாத இடத்துக்கு காணாமல் போகிறாள். மீண்டும் இவர்கள் இணைந்தார்களா என்பது கதை.

இந்த காதல் கதை படத்தை சுவாரஸ்யமாகக் கொண்டு செல்வதற்கான மைய இழை. இதன் வழியாக சென்னையில் வாழும் பார்வையற்றவர்களின் உலகத்துக்கு அழைத்துச் சென்று இப்படியும் ஓர் உலகம் நம்மோடு இருக்கிறது என்பதை காட்டிய வகையில் தனித்துவம் பெறுகிறது படம். கனமான கேரக்டரில் நடித்து அசத்தி இருக்கிறார் தினேஷ். தலையை சாய்த்து, கண்களை உருட்டி, வார்த்தைகளை வெட்டிப் பேசும் பார்வையற்றவரின் உடல் மொழியை பிரமாதமாக வெளிப்படுத்தியிருக்கிறார். மாளவிகாவின் ஸ்பரிசம் கிடைக்கும்போதெல்லாம் அதை வெளிப்படுத்தும் போதும், காதலில் தோற்று, மாளவிகாவின் திருமணத்துக்கு நன்றி கார்டு அடித்து கொடுக்கும்போதும் போலீஸ் நிலையத்தில் கதறும்போதும் கலங்க வைக்கிறார்.

மாளவிகா இன்னும் ஒருபடி மேல். கையை நீட்டி நடந்து பார்வையற்ற பெண்ணாகவே வாழ்ந்திருக்கிறார். பார்வை உள்ளவனை மணக்கப்போகும் சந்தோஷத்தில் பூரித்து, அது ஏமாற்றமாகும்போது கலங்கி, அண்ணன் கொடுமையில் அழுது என காட்சிக்கு காட்சி மிரட்சியை ஏற்படுத்துகிறார். தான் காதலித்தவன் இன்னொரு பெண்ணை மணக்க போவதாகச் சொல்வது, தன் காதலுக்கு எதிர்ப்பு தெரிவித்து அண்ணன் உடைத்த செல்போனை தேடுவது என வாய்ப்பு கிடைத்த இடத்தில் எல்லாம் சிக்சராக விளாசுகிறார்.

தினேஷின் நண்பராக வரும் பார்வையற்ற இளங்கோ, மாளவிகாவின் தோழியாக வரும் நந்தினி, முருகதாஸ், நாடக குழு நடத்தும் ஈஸ்வர் எல்லோருமே அவ்வப்போது ரிலாக்ஸ் தருவதோடு கதைக்குப் பலமாகவும் இருக்கிறார்கள். இசை அமைப்பாளர் சந்தோஷ் நாராயணன்தான் என்றாலும் படத்துக்கு உயிர் கொடுப்பவர் இளையராஜா. பொருத்தமான இடத்தில் அவரது பாடல்களைப் பயன்படுத்தியிருப்பதும், மற்ற இடங்களில் அவர் பாணியில் பின்னணி இசை அமைத்திருப்பதும் அருமை. அழகான இந்தக் கதையை வண்ணமாகத் தந்திருக்கிறார் ஒளிப்பதிவாளர் பி.கே.வர்மா.

அழகாகவும், யதார்த்தமாகவும் கதை சொன்ன இயக்குனர், கடைசி 20 நிமிட கிளைமாக்சில் வழக்கமான தமிழ் சினிமா ஓட்டியிருப்பதுதான் மைனஸ். கடைசி நேரத்தில் அதிர்ச்சி கொடுத்து அனுப்ப வேண்டும் என்கிற வழக்கமான கிளைமாக்ஸ் பார்முலாவுக்குள் சிக்கி படத்தையும் சிக்க வைத்திருக்கிறார். எந்த பிரச்னை என்றாலும் ஒன்றுகூடி நியாயம் கேட்கும் பார்வையற்றவர்கள், தினேஷின் காதல் பிரச்னைக்கு வெறும் பணம் மட்டும் கொடுத்து உதவுகிறார்கள். மூன்று லட்சம் ரூபாயை ஒரு பார்வையற்றவர் தனி ஆளாக கொண்டு செல்கிறார். பார்வையுள்ள நண்பன் முருகதாஸ் உடன் சென்றிருக்கலாமே. மும்பையில் இருக்கும் மாளவிகாவைத் தேடி தனியாக தினேஷ் செல்வதும், இடையில் புனேயில் அவரைச் சந்திப்பதும் அக்மார்க் சென்டிமென்ட் சினிமா.

காதல் சொல்ல ஆசை - திரை விமர்சனம்

E-mail Print PDF

வேலையில்லாமல் தவிக்கும் அசோக்கிற்கு தடாலடியாக ஒரு வாய்ப்பு கிடைக்கிறது. ஒரு பெரும் கோடீஸ்வரரை, கொலை முயற்சியில் இருந்து காப்பாற்ற, அவர், தன் நிறுவனத்தில் அசோக்கை பாதுகாப்பு அதிகாரியாக நியமிக்கிறார். அதே கம்பெனியில்  வேலை செய்யும் வஷ்னா மீது அசோக்கிற்கு காதல் வருகிறது. அவரது தொலைந்து போன செல்போனை அசோக் எடுத்துக் கொடுக்கிறார்.

வில்லன்களால் கடத்தப்பட்டவரைக் காப்பாற்றுகிறார். இருவருக்குமே காதல் இருந்தும் சொல்ல தயங்கிக் கொண்டிருக்கிறார்கள். இந்த நேரத்தில் கோடீஸ்வரரின் மகன் மது வருகிறார். அவர் வஷ்னாவை கண்டு அதிர்ச்சி அடைகிறார். இறந்து போன காதலி போலவே அவர் இருப்பதால் அவரையே திருமணம் செய்ய நினைக்கிறார். இதனால் அவரது அன்பை பெற முயற்சிக்கிறார். மதுவும் வஷ்னாவும் காதலிப்பதாக கருதும் அசோக் அவரை விட்டு விலகிச் செல்கிறார். அசோக்கும், வஷ்னாவும் காதலைச் சொன்னார்களா? மதுவுக்கும், வஷ்னாவுக்கும் திருமணம் நடந்ததா என்பது மீதிக் கதை.

80-களிலேய பல பேர் அரைத்து மாவாக்கிய கதையை, புதிதாகத் தரப்பார்த்திருக்கிறார்கள். எது மாதிரியும் இல்லாமல் போயிருக்கிறது. படத்தின் முன்பகுதியை கலகலப்பாகக் கொண்டு செல்வதற்கு ரொம்பவே மெனக்கெடுகிறார் அசோக். வஷ்னாவை இம்ப்ரஸ் பண்ண அவர் செய்யும் சேட்டைகள் கலகல ரகம். தான் காப்பாற்றியவர் தன்னை பாதுகாவலனாக நியமிக்கும்போது என்னை அடியளாக்க பார்க்குறீங்களா என்று கொதிப்பது, நல்ல நடிப்பு. வலுக்கட்டாயமாக போலீஸ் வேலைக்கு அனுப்ப நினைக்கும் அப்பாவை வெறுப்பதும் பிறகு அவர் ஆசையில் நியாயம் இருப்பதை உணர்வதுமாக நிறைவாகச் செய்திருக்கிறார். இவரைப் போலத்தான் மது ரகுராமும், காதலியை இழந்த சோகம், அவளைபோன்ற தோற்றம் கொண்டவளை பார்த்த சந்தோஷம், லேசாகத் தலைதூக்கும் வில்லத்தனம், பின்பு நிலை உணர்ந்து மாறும் மனமாற்றம் என கேரக்டரை உள்வாங்கிக்கொண்டு நடித்திருக்கிறார்.

வஷ்னாவுக்கு நடிக்க அதிக வாய்ப்பில்லை. அசோக், மதுவுடன் ஆடும் டூயட்டில் கவர்ச்சிக்கு வாய்ப்பிருக்கிறது. வில்லனாக வரும் ராஜேந்திரனும் அவரது அடியாட்களும், சீரியசான வில்லனாகவும் இல்லாமல் காமெடியனாகவும் இல்லாமல் இருக்கிறார்கள். அசோக்கின் நண்பனாக வருகிறவர் சிரிக்க வைக்கிறார். ஆனால் தம்பி ராமையாவை அப்படியே காப்பி அடித்திருப்பது எரிச்சல். எம்.எஸ்.பாஸ்கரை சரியாகப் பயன்படுத்திக் கொள்ளவில்லை. ஒளிப்பதிவு பரவாயில்லை ரகம்.

எம்.லேகாவின் இசையில் பாடல்கள் கேட்கும் தரம். மகிழ்ச்சியும், நெகிழ்ச்சியுமாய் ஒரு காதல் கதையை தர முயற்சித்திருக்கிறார்கள். நடிப்பு, உழைப்பு, தொழில்நுட்பம் அனைத்தும் ஒத்துழைத்திருந்தபோதும் திரைக்கதை வடிவம் மற்றும் பார்த்த காட்சி அமைப்புகளால் சொல்ல வந்ததை சரியாகச் சொல்ல முடியாமல் தவிக்கிறார்கள்.

Page 2 of 84

முத்துமாரி அம்மன் ஆலயம்

ஞான வேலாயுதர் ஆலயம்

சித்தி விநாயகர் ஆலயம் - சாந்தை

சம்புநாதீஸ்வரர் ஆலயம்

காடேறி ஞானபைரவர் ஆலயம்