Saturday, Oct 21st

Last update05:45:10 AM GMT

தலைப்புச் செய்திகள்:
You are here: சமூக நோக்கு

சரித்திர நோக்கில் சாந்தையும், சித்திவிநாயகர் ஆலயமும்

E-mail Print PDF

சரித்திர நோக்கில் சாந்தையும் விநாயகர் ஆலயமும் ( ஆய்வுக்கட்டுரை)


ஆய்வு செய்தவர் : திரு.த. குணத்திலகம்,
ஓய்வு பெற்ற ஆசிரியர்,
சாந்தை,
பண்டத்தரிப்பு.

ஈழத்திருநாட்டின் சிரசாம் வடபால் அமைந்துள்ள யாழ்ப்பாண நன்நகரின் முகமென தோன்றும் மேற்குக் கரையோரத்தில் வரலாற்றுப் புகழ் மிக்க ஜம்புகோளத்துறையை அண்டிய பண்டத்தரிப்புப் பிரதேசத்தில் செந்நெல் கொழிக்கும் தும்பளப்பாய் வயல் வெளியுடன் கூடிய சைவமும் தமிழும் தழைத்தோங்கும் ஒரு அழகிய கிராமம் சாந்தையாகும். இங்கு கோயில் கொண்டிருப்பவர் அருள்மிகு சித்தி விநாயகராவார். இக் கோயில் எந்தக் காலத்தது என்பது திட்டவட்டமாகக் கூற முடியாதுள்ளது. எனினும் இலங்கையின் சரித்திரத்தை ஆராயும் பொது இது மிகவும் பழமை வாய்ந்தத்தாகக் கருத இடமுண்டு.

கி.மு. மூன்றாம்  நூற்றாண்டு இலங்கையை  ஆண்ட  மன்னன் தேவநம்பியதீசன் இந்துசமயத்தவன். இக்காலத்தில் யாழ்ப்பாணத்தில் வாழ்ந்து வந்த ஒரு நாகரீக இனம் நாகர் இனமாகும். இவர்களும் இந்து சமயிகளாவர். அனுராதபுரத்தை ஆண்ட மூத்த சிவன் யாழ்பாணத்தின் கதிரமலையின் அரசாண்ட நாகர் குலத்தில் திருமணம் செய்தான் எனவும், அவர்களின் புதல்வனே தேவநம்பியதீசன் எனவும் மிகப்பழம் சிங்கள இலக்கிய நூலாகிய மகாவம்சம் கூறுகிறது.

இந்தியாவிலிருந்து வந்த மகிந்ததேரர் என்னும் புத்தபிக்குவின் உபதேசத்தில் மனம் மாறிய தேவநம்பியதீசன் புத்தசமயத்தைத் தழுவிக் கொண்டான் இருப்பினும் தீவிர சைவர்கள் தம்மதத்தை விட்டுக் கொடுக்காது சைவசமயத்தை கடைப்பிடித்தனர் என மகாவம்சம் கூறுகிறது. மக்கவம்சம் ஒரு சிங்கள பௌத்த இலக்கிய நூலாகையால் அது பௌத்தத்தை முதன்மைப்படுத்தியே கூறியுள்ளது. எனவே மகாவம்சத்தை அடிப்படையாக வைத்து நாம் இந்து சமயத்தின் நிலைமையை ஊகித்தறியமுடியும். இக்கூற்றின் படி இந்துசமயிகள்   இங்கு வாழ்ந்ததால் இந்துக்கோயில் நிச்சயமாக இருந்திக்கும்.

எனவே இலங்கைக்கு புத்தசமயம் கொண்டு வரப்பட்டபோது இங்கு இவ்வாலயம் இருந்து இருக்கலாம் என ஊகிக்கமுடிகிறது. ஏனெனில் புத்த பிக்குணியாகிய சங்கமித்தை புனித வெள்ளரசங்கிளையுடன் வந்து சம்பில்துறையில் இறங்கிய பொது தேவநம்பியதீசன் இவ்வாலயம் இருக்கும் இடத்தில் வடபுறம் ஒருமடத்தில் (அவனால் அமைக்கப்பட்டதென்பர்) தங்கி இருந்து வரவேற்றான் என மகாவம்சம் கூறுகிறது..

கர்ணபரம்பரைக் கதை
எனினும் இம்மடம் முற்காலத்தில் பிதிர்க்கடன் நிறைவேற்றும் மடமாக இருந்ததென கர்ணபரம்பரை மூலம் அறிய முடிகிறது . அதாவது பல நூறு வருடங்களுக்கு முன் சாந்தை என்ற இடம் இந்துமயானமாக இருந்ததெனக் கூறப்படுகிறது. இதற்காதாரமாகச் சில தடயங்களும் தகவல்களும் காணப்படுகின்றன. இவ்வாலயத்தின் முன்பக்கத்தில் உள்ள காணிகள் "சுடுகாட்டுப்பிட்டி"  என உறுதியில் குறிப்பிட்டிருப்பதும், பின்புறத்தில் உள்ள நெற்காணிகள் "குருக்கள் வரவை" என அழைக்கப்படுவதும் இதன் தெற்குப்புறமாக ஒரு கேணியும் அரசமரமும்  இருந்ததாகவும் வடக்குப்புறமாக மடம் குருக்கள் பிதிர்க்கடன் செய்து இக்கேனியின் புண்ணிய தீர்த்தத்தில் சேர்ந்ததாகவும் நம் முன்னோர்களால் வழிவழியாகக்  கூறப்பட்டு வருகின்றன. தெற்குப்புறம் இருந்த அரசமரம் சங்கமித்தை நாட்டியதாகச் சிலர் கூறுவது அறியாமையாகும். சங்கமித்தை பொற்கலத்தில் கொண்டுவந்த  புனித வெள்ளரசங்கிளை மிகவும் புனிதத்துடன் ஊர்வலமாக கொண்டு சென்று அநுராதபுரத்தில் விழா எடுத்து நாட்டியதாக  மகாவம்சம் கூறுகிறது. சிலர் ஊருக்குப் புகழ் என நினைத்து "பொல்லு கொடுத்து அடி வாங்கும் " நிலையில் தவறான கருத்து விளங்குகிறார்கள். சங்கமித்தை வரமுன்பு இங்கு அரசமரம் இல்லை என கூற முடியாது. இந்த மரம் அதற்கு முற்பட்ட கால மரமாகவும் இருக்கலாம்.

சங்கமித்தை கொடு வந்தது புனித வெள்ளரசமரம் ஆனால் இங்கிருந்ததோ சாதாரண அரச மரம். புத்தர் ஞானம் பெறும் பொழுது அவருக்கு நிழல் கொடுத்தது தான் புனித வெள்ளரசமரம். அந்த மரத்தின் கிளை தான் அநுராதபுரத்தில் நாட்டியதாக மகாவம்சம் கூறுகிறது. எனவே இவர்களின் கருத்து புனித அரசமரத்தை கொச்சைப்படுத்தும் ஒரு கருத்தாகவே நான் கருதுகிறேன்.

சாந்தை சுடலையாக இருந்ததற்கு உதாரணம்

இப்பகுதி சுடலையாக இருந்ததென்பதை இக்கால மக்கள் ஏற்க மறுக்கலாம். ஏனெனில் இது பலநூறு வருடங்களுக்குமுன் ஏற்பட்ட ஒரு விடயம். இந்த சுடலை தான் பிற்காலத்தில் சம்பில்துறைமயானமாக மாறியது. இந்தச் சம்பில் மயானம் கடந்த முப்பது வருடங்களாக நாட்டு நிலை காரணமாக உபயோகிக்முடியாது மீண்டும் உள்நோக்கி வந்து சாந்தை வயற்கரையின்  மேற்கு அந்தமான சந்நியாசி கேணியடிக்கு மாற்றப்பட்டதை யாவரும் அறிவர்.

எமது சம்பில்துறை மயானம் இன்று நரசிங்க சுவாமிகளால் (வெற்றிவேல் சாமி) சம்புநாதீஸ்வரர் ஆலயம் அமைக்கப்பட்டு அவரின் அதிகாரத்துக்கு உட்பட்ட சொந்த இடமாகக் காணப்படுவதை யாவரும் அறிவர். ஆனால் எமக்குப்பின்வரும் எமது வருங்காலச் சந்ததியினர் இவை பற்றி அறியமாட்டார்கள். இந்த நிலைதான் சாந்தை சுடலையின் நிலையும். சம்பில் சுடலை மாறியது இப்போது. சாந்தை சுடலை மாறியது அப்போது. ஆகவே கர்ணபரம்பரைக் கூற்றுக்களை நாம் மறுக்கவும் முடியாது. சம்பில்துறையில் அமைந்து இருந்த சம்புணாதேஸ்வரர் ஆலயம் இன்று உள்நோக்கி வந்து பணிப்புலம் சாந்தா ஒல்லை என்ற இடத்தில் அமைந்து இருப்பதை நாம் அறிகிறோம். இவை கால ஓட்டத்தில் நிகழ்ந்தவை.

செட்டியார்மாரின் வருகையும் குடியேற்றமும்

இவை நிற்க, ஆலய விடயத்துக்கு வருவோம். சுடலையாக  இருந்த கிராமம் அக்கால தென்னிந்திய செட்டிமாரின் வணிகப் பிரதேசமாக மாறியது.சம்பில்துறை அக்காலத்தில் ஒரு வணிகத்துறையாக  விளங்கியது. தென்னிந்தியச் செட்டிமாரே அக்கால வணிகர்களில் பிரசித்தி பெற்றவர்களாக விளங்கினர்.

இவர்கள் இத்துறை மூலம் வணிகம் செய்த போது இத்துறையை அண்டிய இக்கிராமத்தில் தமது குடியிருப்புக்களையும் அமைத்தனர். சாந்தை, பணிப்புலம், செட்டிகுறிச்சி என இப்போது அழைக்கப்படும் இடங்கள் முற்காலத்தில் இந்தியாவிலிருந்து குடியேறிய செட்டிமாரின் குடியிருப்புகளாகும். இவர்கள் அங்கிருந்து வந்து இங்கு குடியேறிய போது "கோயில் இல்லா ஊரில் குடியிருக்க வேண்டாம்" என்னும் கூற்றுப்படி தாம் வணங்கிய குலதெய்வங்களை இங்கு கொண்டு வந்து வழிபட்டனர் எனக் கூறப்படுகிறது. சாந்தா ஒல்லை சம்புநாதேஸ்வரர் ஆலயம், சாந்தை ஈஸ்வர விநாயகர் (இன்று சித்தி விநாயகர்) சுழிபுரம் கண்ணகை அம்மன் ஆலயம், காலையடி ஞானவேலாயுதர் ஆலயம்(இடும்பன் ஆலயம்) வெற்றிமடம் முருகன் ஆலயம் என்பன செட்டிமாரின் பராமரிப்பில் இருந்து இன்று கைமாறியுள்ளதை  அறிகிறோம். இவர்களின் மூதாதைகள் பரிபாலித்து வந்த ஆலயங்கள் உள்ள பிரதேசங்கள் இன்று எவ்வளவு மாற்றம் பெற்றுள்ளன என்பதை நாம் கண்கூடாகக் காண்கிறோம். எனவே செட்டிமாரின் வருகையுடன் இவ்வாலயம்   ஆரம்பமானது என்பதிற்  சந்தேகமில்லை.

செட்டிமார் வரவு என்பது தென்னிந்திய வாணிபம். இங்கு நடைபெற்ற காலமாகும். இவர்கள் தென்னிந்தியாவில் வழிபட்ட குலதெய்வமான சந்தோஷி விநாயகரை இங்கு கொண்டு வந்து ஒரு பாரிய இலுப்பை மரத்தடியில் வைத்து வணங்கினர். பிற்காலத்தில் சந்தோஷி என்ற சொல் மருவிச் சாந்தை எனப்பட்டது. இதனால் சாந்தை விநாயகர் எனப்பட்டதுடன் இவ்விடம்  சாந்தை எனப்பெயர் வந்ததெனக்  கர்ணபரம்பரைக்கதை கூறுகிறது.

இவ்விநாயகர் சாந்தகுணம் உள்ளதால் சாந்த விநாயகன் எனப்பட்டு பின் சாந்தை விநாயகன் எனப்பட்டார் எனக் கூறுவாருமுளர். எப்படி இருப்பினும் விநாயகரின் சம்பந்தப்பட்ட காரணப்பெயரே "சாந்தை" எனத் துணியலாம் (சந்தோஷி விநாயகர் சம்பந்தப்பட்ட புராணக் கதை பின்  ஒரு சந்தர்ப்பத்தில் கூறுவோம்).இதற்குப் பின்வந்த அந்நியர் ஆட்சியில் இந்து  ஆலயங்கலளிக்கப்பட்ட போதுங்கூட இச்சிறு ஆலயம்மட்டும் அழியாது தப்பிப் பிழைத்தது இவ்வாலய மூர்த்தியின் கீர்த்தியேயாகும்.

செட்டிமார்களின் பரம்பல் தேய்ந்து போனமை

இலுப்பை மரத்தடியில் ஓலைக்கொட்டிலில் சந்ததி சந்ததியாக இங்கிருந்த செட்டிமார்களினால் பூசிக்கப்பட்டு வந்த இவ்வாலயம் பிற்காலத்தில் ஆதரித்தவர்கள் அயற்கிராமங்களுக்கும்,  அந்நிய நாடுகளுக்கும் புலம் பெயர்ந்ததால் இங்கு நிரந்தரமாகக் குடியிருந்த  வினாசித்தம்பிச் செட்டியார், கந்தர் செட்டியார் என்போரின் பராமரிப்பில் வந்தது. வினாசித்தம்பிச் செட்டியார் தன் சகோதரனான கந்தர் செட்டியாரிடம் பூசைகளை ஒப்படைத்தார். இதன் பின் கந்தர் செட்டியாரின் பரம்பரைக்கு இக்கோயில் வந்தடைந்தது. கந்தர் செட்டியாரின்பின் அவர் மகன் ஆறுமுகச் செட்டியார் பராமரிப்பில் வந்தது. இக்காலத்தில் 1930  பணிப்புலம் பிலபல வர்த்தகர் சிவதொண்டர் திரு.த.சிவசம்பு அவர்களால் கர்ப்பக்கிரகத்துடன் கூடிய ஒரு ஆலயமமைத்துப் பிரதிஷ்டை செய்யப்பட்டது. ஆறுமுகச் செட்டியார் காலத்தில் பூசைகள் ஒழுங்காகவும்  புனிதமாகவும் நடைபெற்று வந்ததை நாம் அறிவோம். இவ்வாலயத்துக்கு என அக்காலச்  செட்டியார்கள் பல நெற் காணிகளை நிரந்தகமாக எழுதி வைத்திருந்தார். ஆனால் அக்கானிகள் இன்று ஆலயத்தின் பெயரில் இல்லாமல் போனது துர் அதிர்ஷ்டமே. ஆறுமுகச் செட்டியாரின் பின் அவர் மகன் பஞ்சாச்சரச் செட்டியாரின் காலத்தில் இவ்வாலயத்தின் நடைமுறைகள் மாற்றங்களுக்கு  உள்ளாகின. இவ்வாலயத்தை புனிதமாக பராமரிக்க சந்ததிகள் இங்கு இல்லாது போய்விட்டது. வெளிநாட்டு மோகம் சந்ததி சந்ததியாக வணங்கி வந்த விநாயகரையே பிரித்து விட்டது. இவர் தமது பிள்ளைகளுடன் வெளிநாடு சென்று தம் வாழ்வைத்  தேடிக்கொண்டார். இவரின் வெளிநாட்டுச் சங்கமிப்புடன். விநாயகர் ஆலயம் ஊர் மக்களின் பராமரிப்பில் வந்தது.

கிராம மக்கள் பொறுப்பில் ஆலம்
ஊர் மக்கள் பொறுப்பேற்றதும் ஆலயம் புனருத்தானம் செய்யப்பட்டது. 2001இல் கும்பாபிசேகம் செய்யப்பட்டு இன்றுவரை கிராம மக்கள் நிர்வாகத்திலேயே பரிபாலிக்கப்படுகிறது. கருவறை, மகாமண்டபம், தம்பமண்டபம், மடப்பள்ளி, மணிக்கோபுரம் ஆகிய திருப்பணிகள் செய்யப்பட்டு  2010 இல் வசந்த மண்டபமும் புதிதாக அமைக்கப்பட்டுள்ளது. இப்போது நித்திய பூசைகளும்,விசேஷ பூசைகளான மாதச் சதுர்த்தி, விநாயக சஷ்டி, மற்றும் விசேஷ தினப் பூசைகளுடன் ஆவணி மாத விநாயக சதுர்த்தியை இறுதி நாளாகக் கொண்டு 12 நாட்கள் அலங்காரத்திருவிழாக்கள் நடைபெற்று வருகின்றன.

இவ்வாலய மூர்த்தியின் கீர்த்தி பற்றி கூறும் கர்ணபரம்பரைக் கதைகளில் சிலவற்றைக் கூற விரும்புகிறேன்.

1) பெட்டைக்கடலுடன் போராடியமை.
மிகப்பழங்காலத்தில்  அண்மையில் ஏற்பட்ட சுனாமி போன்று ஒரு பெரும் கடற்கோள் ஏற்பட்டது. சம்பில்த்துறைக்கடல் பெரும்சீற்றத்துடன்  பொங்கி எழுந்து வயல் வெளிக்கு மேலாகப்பாய்ந்து  வந்தது. அப்போது இங்கிருந்த மக்கள் அலறி அடித்து விநாயகனை ஓலமிட்டனர். உடனே  மக்களைக் காக்க வேண்டி விநாயகன் இடப்பக்கம்திரும்பி பெட்டைக்கடலே எனக்கூறி தடுத்து எதிர் கொண்டார் அப்போது விநாயகனின் இடக்கண்ணும் இடக்காதும் கடலால்தாக்கப்பட்டு கண்ணையும் காதையும் இழந்தார் எனவும் கடல்திரும்பிச்சென்றதாகவும் ஒரு கதை கூறப்படுகிறது. இக்கதையில் உண்மை இருக்கலாம் என்பதற்கு சிவபெருமான் தேவர்கள் அமிர்தம் கடையும் போது வெளிப்பட்ட ஆலகால விஷத்தை உண்டு  தம் தொண்டையில் நிறுத்தித் தேவர்களைக் காத்தமையைக் கூறும் புராணக்கதையை நோக்கலாம். இன்றும் சம்பில்கடலை பெட்டைக்கடல் என்றே கூறப்படுகிறது. இதற்குப்பின் இக்கடல் சீற்றம்கொள்வது இல்லை என்பதை   அண்மைய சுனாமியின் போது அறிய முடிந்தது.

2)தேவ பூசை (சுமார் நூற்றைம்பது வருடங்களுக்கு முன் நடைபெற்ற சம்பவம்)
கந்தர் செட்டியார் பூசை செய்த காலத்தில் வியாபரத்தின் நிமித்தம்   வெளியூர் செல்வது வழக்கம் இக்காலத்தில் அவரது சகோதரர் வினாசித்தம்பிச்  செட்டியார் விநாயகருக்கு பூசை செய்வார். ஒரு முறை செட்டியார் இருவரும் வெளியூரில் தங்கவேண்டி ஏற்பட்டதால் சிலநாட்கள் விநாயகருக்குப் பூசை நடை பெறவில்லை. அக்காலத்தில் இக்கோயிலின் அயலில் இப்போது போன்று குடிகள் இல்லை. சுமார் 100 மீற்றருக்கு அப்பால் எனது பாட்டனார் வீடு மட்டும் (ஒட்டு வீட்டு வைத்தி) இருந்தது. ஒரு நாள் இரவு விநாயகர் அமர்ந்திருந்த இலுப்பைமரத்தடியில் சங்கு சேமக்கல ஒலிகள் கேட்டதாகவும் எனது பாட்டனார் உடன் அவ்விடம் சென்று பார்த்த போது எதையும் காணாது அதிசயத்துடன் திரும்பி  வந்ததாகவும் பின்னர் செட்டியார் ஊருக்கு திரும்பியதும் நடந்த அதிசயத்தை கூறியதாகவும் அப்போது செட்டியார் இது தேவ பூசை எனக்கூறி பூசை சிலநாட்கள் செய்யாததால் தான் தேவர்கள் வந்து பூசை செய்தனர் எனவும்  அன்றில் இருந்து நாள் தப்பாது கிரமமாக பூசை செய்து வந்ததாகவும் கூறப்படுகிறது

3) அரச மரம் பற்றிய கதை (சுமார் 40 வருடங்களுக்கு முன் நடந்த சம்பவம்)
இக்காலம் கந்தர் செட்டியார் மகன் ஆறுமுகச் செட்டியார் காலமாகும். இவர் விநாயகருக்கு மிக விசுவாசமாக பூசை செய்பவர். கோயில் வாசலில் எமது வீடு உள்ளதால் நான் சிறுவனாக இருக்கும் போது அவரிடம் சென்று அன்றாடம் பூசைப்பிரசாதம் வாங்கி உண்பது வழக்கம். அப்போது இவ்வாலயம் பற்றி பல கதைகள் சொல்வார் அவற்றில் ஒன்று தான் பெட்டைக்கடல் கதையாகும். இவர் காலத்தில் ஆலயத்தின் தெற்குப்புறம் இருந்த அரச மரம் பற்றி புகழ் பிரசாரம் செய்யப்பட்டதால் பௌத்த துறவிகள் ஒரு நாள் இங்கு வந்து இந்த அரச மரத்தைப் பார்த்து இங்கு உள்ளவர்களிடம் இது பற்றி விசாரித்துச்  சென்றனர். இதைக்கண்ட ஆறுமுகச் செட்டியார் வேதனை அடைந்தார். பௌத்த பிக்குகள் இவ்விடத்தை ஆக்கிரமித்து புத்த கோயில் கட்ட போகிறார்கள் எனவும் எமது விநாயகர் ஆலயத்துக்குப் பேராபத்து வரப்போகிறதே எனவும் பயந்தார். அன்றிரவு விநாயகர் செட்டியார் கனவில் தோன்றி "இந்தச் சர்ச்சைக்குரிய அரச மரம் இருப்பதால் தானே நீர் கவலைப்படுகின்றீர் இதை இல்லாமற்  செய்தால் உமது கவலையும் இல்லாமற்  போகும்"  எனக்கூறி மறைந்தார். சில நாட்களில் அந்த பாரிய அரச மரம் பட்டுப்  போனது. அரச மரம் நின்ற இடமே  தெரியாமற் போனது. செட்டியார் கவலையும் நீங்கியது.

4) யுத்த அனர்த்தத்தினால் ஏற்பட்ட அழிவு
இது மிக அண்மையில் நடைபெற்ற சம்பவம் ஆகும். இராணுவத்தாக்குதலினால் எமது தமிழர் பகுதிகள் நாசமாகிக்கொண்டு இருந்தன. மாதகளில் நிலை கொண்டிருந்த இராணுவமும் சம்பில் கடலில் நிலை கொண்டிருந்த கடற்ப்படையும் ஏவிய பீரங்கிக் குண்டுகளும் எறிகணைகளும் விமானப்படையினரின் விமானக்குண்டு வீச்சும் தமிழர் பகுதிகளை மிக மோசமாகத் தாக்கி  பேரழிவுகளை ஏற்படுத்திய வேளை எமது விநாயகர் ஆலயத்தின் முன் உள்ள பகுதிகள் எவ்வித அழிவுகளுக்கும் உட்படவில்லை. எமது ஆலயத்துக்கு தெற்கே உள்ள சம்புநாதீஸ்வரம் மேற்கே  உள்ள காட்டு வைரவர் ஆலயம் வடக்கே உள்ள அந்தோனியார் ஆலயம் உட்பட இவ்வாலயத்தின் தென்மேற்குப்பகுதியில் உள்ள சில வீடுகளும் முற்றாக சேதமடைந்தன. அனால் எமது சாந்தை விநாயகர் ஆலயத்தில் ஒரு ஓடு தானும் உடையவில்லை. இது இக்காலத்தில் ஏற்பட்ட மிக அதிசயமாகும்.

இப்படி விநாயகனின் கீர்த்தி  இருந் போதும் சிலர் காலத்துக்கு ஏற்காத நம்ப முடியாத சில வதந்திகளைக் கூறி மக்களிடம் மூட நம்பிக்கையை ஏற்படுத்தும் அதே நேரம் தாமும் நகைப்புக்கு ஆளாகின்றனர். அண்மையில் நடை பெற்ற ஒரு வதந்தியை இங்கு குறிப்பிட விரும்புகிறேன். உண்மையே பேசி அறியாத ஒருவர் கோயில் மணியை அடித்துக்  கொண்டு இருந்த போது பட்டப்  பகலில் திடீரென ஒரு சோதி தோன்றியதாம். அவர் திரும்பிப் பார்த்த போது விநாயகர் கோயிலுக்குள் நுழைவதைப்  பார்த்ததாகவும் பின்னர் சென்று பார்த்த போது கோயிலின் பல வருடங்களுக்கு  முன் அமைக்கப்பட்ட உலர்ந்த சீமெந்துத்   தரையில் காலடிகள் இருப்பதாகவும் கூறி மக்களைக் குழப்பி உள்ளார். இக்காலத்தில் இப்படி கிறீஸ்தவ ஆலயங்களிலும் அற்புதங்கள்  நடை பெற்றதாகக் கூறப்படுகிறது. இது காலத்துக்கு ஏற்காத கட்டுக்கதையாகும். விஞ்ஞானம் மலிந்துள்ள இக்காலத்தில் மக்கள் குழம்பி கடவுள் நம்பிக்கையை இழக்க வைக்கும் கேலிக் கட்டுக்கதைகளைத் தயவு செய்து பிரபல்யப்படுத்த வேண்டாம் என சம்பந்தப்பட்டவர்களிடம்  கேட்டுக்கொள்கிறேன்.

நன்றி


சாந்தை வினாயகர் வரலாற்றை விரிவாகாக் கூற வேண்டி ஏற்பட்டதால் சரித்திரத்தை ஆராய வேண்டி ஏற்பட்டது. எனது சரித்திர ஆராய்ச்சிக்கு உட்பட நூல்களாவன,
1. யாழ்ப்பாணச்சரித்திரம் - முதலியார் இராசநாயகம் எழுதியது.
2.யாழ்ப்பாணச்சரித்திரம் -கல்லாநிதி முத்துத்தம்பிப்பிள்ளை எழுதியது
3.யாழ்ப்பாண இராச்சியம் -A.S.உதயகுமார் எழுதியது

நேரடித்தகவல் தந்து உதவியவர் -நூறு வயதைத் தாண்டி இன்றும் சுய அறிவுடன் ஆரோக்யமாக வாழ்ந்து கொண்டு இருக்கும் செட்டிகுறிச்சி செட்டியார் பரம்பரையில் உதித்த சம்புமுத்து ஆச்சி (இவரின் தந்தையார் வினாசித்தம்பிச் செட்டியாரின் கந்தர் செட்டியாரும் கூடப்பிறந்த சகோதரர்களாவர்)

எனது ஆய்வு பற்றிய அபிமானிகளின் கருத்துக்களை எதிர் பார்க்கிறேன்.

நன்றி.

திரு.த.குணத்திலகம்
ஓய்வு பெற்ற ஆசிரியர்
சாந்தை
பண்டத்தரிப்பு.
10.09.2010

 

 

 

 

758.23.05.2014

பணிப்புலம் - வயல்கரை சம்புநாதீஸ்வரர் ஆலய வரலாறும் நிகழ்வுகளும்.

E-mail Print PDF

Image may contain: one or more people

“மூர்த்தி சிறியது ஆனாலும் அவர் கீர்த்தி மிகவும் பெரியது”

திருசிற்றம்பலம்

இலங்கையில் பிரசித்திபெற்று விளங்கிய பழம் பெரும் சிவாலயங்களில்  சுயம்பு சேஷ்திரமாகிய சம்புநாதர் சேஷ்திரம் என அழைக்கப்படும் சம்புநாதீஸ்வரர் ஆலயமும் ஒன்றாகும். இவ் ஆலயம் தட்சண கைலாசமாகிய திருகோணமலைக்கு (கோணேஸ்வரத்திற்கு) வடக்கு திசையிலும் இராமசேதுவுக்கு (இராமேஸ்வரத்திற்கு) கிழக்கு திசையிலும் (குறிப்பாக வலிகாமம்-மேற்கில்) அமைந்திருந்ததாக தட்சண கைலாய புராணம் - சுயம்புநாத படலத்தில் குறிக்கப்பட்டுள்ளது.

அ. மி. (அமெரிக்கன் மிஷன்) தமிழ் கலவன் பாடசாலை - காலையடி : தோற்றமும் அதன் வளர்ச்சியும்

E-mail Print PDF

பண்ணாகம் வடக்கு (பணிப்புலம்) அமெரிக்கன் மிஷன் தமிழ் கலவன் பாடசாலை

ஆக்கம்: திரு. சி. கந்தையா அவர்கள் (கனடா)
இளைப்பாறிய அதிபர், அ.மி.தமிழ் கலவன் பாடசாலை (காலையடி)

ஆங்கிலேயர்கள் இலங்கையை ஆட்சி செய்த காலத்தில் யாழ் குடாநாட்டின் வலிகாமம்-மேற்கு பிரிவில், சங்கானை கோவில்பற்று ஒரு பரந்த பிரதேசமாக அமைந்திருந்தது. அதன் மேற்குப் பகுதியில் இருந்த சுழிபுரம் இறையாட்சிக்கு உட்பட்ட பிரதேசத்தில் பண்ணாகம் என்னும் கிராமத்துடன் அதன் வடக்கே இருந்த பணிப்புலம் என்ற சிற்றூரும் இணைக்கப்பட்டு இருந்தது. அதனால் பணிப்புலம் என்ற சிற்றூர் பண்ணாகம் - வடக்கு என்ற பெயரால் அப்போது அழைக்கப்பட்டது.

அமெரிக்கன் மிஷனரி சபையினர் தங்கள் மொழியாகிய ஆங்கிலத்தையும், கிறிஸ்தவ மதத்தையும் இலங்கைமுழுவதும் பரப்புவதில் பத்தொன்பதாம் நூற்றாண்டின் பிற்பகுதியில் மும்முரமாக செயல்பட்டனர். அதனை நடைமுறைப் படுத்தும் நோக்கில் பல பாடசாலைகளையும், கல்லூரிகளையும் ஆரம்பித்தனர். அதன் அடிப்படையில் 1872 ம் ஆண்டு ஜனவரி மாதம் பண்ணாகம்-வடக்கிலும் (பணிப்புலத்திலும்) ஓர் பாடசாலை ஆரம்பிக்கப்பட்டு பண்ணாகம்-வடக்கு அமெரிக்கன் மிஷன் தமிழ்க் கலவன் பாடசாலை என பெயர் சூட்டினார்கள். ஆரம்ப காலத்தில் இப் பாடசாலையில் ஐந்தாம் வகுப்புவரை வகுப்புகள் நடைபெற்றன. நாளடைவில் எட்டம் வகுப்பு வரை வகுப்புகள் நடைபெற்றன.


அக்காலத்தில் இப்பகுதியில் வாழ்ந்த தமிழ் மக்கள் அனைவரும் சைவசமயத்தவர்கள். அவர்களை கிறிஸ்தவ மதத்திற்கு மதம் மாற்றும் நோக்கிலேயே இப்பாடசாலை ஆரம்பிக்கப்பட்டது. அதன் முதல் கட்டமாக வேலையற்றிருந்த படித்தவர்களை கிறிஸ்தவ மதத்திற்கு மதம் மாறினால் ஆசிரியர் வேலை தருவதாக அறிவிக்கப்பட்டது. அதனால் பலர் சைவசமயத்தில் இருந்து கிறிஸ்தவ மதத்திற்கு மதம் மாறினார்கள். அவர்களுக்கு மத போதனையுடன் ஆசிரிய பயிற்சியும் வழங்கப்பட்டு ஆசிரியர்களாக நியமித்தார்கள்.

இப் பாடசாலை அமெரிக்கன் மிஷனறி சபையினரால் நிர்வகிக்கப்பட்டு வந்ததுடன் ஆசிரியர்களின் சம்பள கொடுப்பனவுகள் யாவும் அவர்களால் வழங்கப்பட்டது. பண செல்வாக்கினாலும் நன்கு திட்டமிடப்பட்ட முயற்சிகளினாலும் சைவ மதத்தவர்களை கிறிஸ்தவர்களாக மதமாற்றம் செய்யும் நடவடிக்கைகளிலும் ஆங்கில மொழி திணிப்பிலும் அவர்கள் ஓரளவு வெற்றியும் கண்டார்கள்.

இம் மத மாற்றத்தைக் கண்டு விழிப்புணர்வு கொண்ட சைவ அறிஞர்கள் அதற்கு ஒரு முற்றுப்புள்ளி வைக்கும் நோக்கில் திரு. இராசரத்தினம் (சட்டத்தரணி) அவர்களை பிரதம இயக்குனராக கொண்ட "இந்து சமய அபிவிருத்திச் சங்கம்" என்ற சபையை ஆரம்பித்து அதனை அரசாங்கத்தில் பதிவு செய்து இயங்க ஆரம்பித்தனர். ஒவ்வொரு கிறிஸ்தவ பாடசாலைக்கும் எதிராக "சைவ தமிழ் ஆங்கில பாடசாலைகளை" ஸ்தாபித்தனர். அதன் பயனாக எமது கிராமத்திலும் கிறிஸ்தவ பாடசாலையாக இயங்கி வந்த பண்ணாகம்-வடக்கு அமெரிக்கன் மிஷன் தமிழ் கலவன் பாடசாலையின் மேற்கே சுழிபுரம் - ஆறுமுக வித்தியாசாலையும் கிழக்கே பண்டத்தரிப்பு - இந்துக்கல்லூரியும் தெற்கே - பண்ணாகம் மெய்கண்டான் பாடசாலையும் உதயமானது. படித்து வேலையற்றிருந்தோர் குறைந்தது இருபத்தைந்து மாணவர்களை புதிய பாடசாலையில் சேர்க்குமிடத்து அவர்களின் கல்வித் தகைமைக்கு ஏற்ப ஆசிரியர் பதவிகளும் வழங்கப்பட்டன.

காலப்போக்கில் எல்லாப் பாடசாலைகளும் அரசாங்கத்தினால் பொறுப் பேற்க்கப்பட்ட பொழுது அமெரிக்கன் மிஷனறி சபையினரின் பொறுப்பில் இருந்த இப் பாடசாலையும் (1962 ல்) பொறுப் பேற்கப்பட்டு கல்வித் திணைகளத்தின் நிர்வாகத்தின் கீழ் கொண்டுவரப்பட்டது.

இப் பாடசாலையின்ஆரம்ப காலத்தில் பல வெளியூர் பிரமுகர்கள் அதிபர்களாக கடமையில் ஈடுபடுத்தப்பட்டிருந்தனர். காலப்போக்கில் உள்ளூர் பிரமுகர்களுக்கும் அதிபர்கள் ஆகும் வாய்ப்பு கிட்டியது. வெளியூர் அதிபர்களுள் தெல்லிப்பளையச் சேர்ந்த மதிப்பிற்குரிய திரு. அ. கார்த்திகேசு அவர்கள் எமது கிராம மக்களினதும் மாணவர்களினதும் சக ஆசிரியர்களினதும் பெரு மதிப்பைப் பெற்ற அதிபராக விளங்கினார்.

இப் பாடசாலையின் முன்னேற்றத்திற்காக அயராது உழைத்த அதிபர் திரு. அ. கார்த்திகேசு அவர்களைப் பற்றி கூறாது இருக்க முடியாது. அவர் தெல்லிப்பளையச் சேர்ந்தவராக இருந்த போதிலும் எமது ஊரையும் தமது ஊர்போல் மதித்து எங்கள் ஊர் மக்களின் முன்னேற்றத்திற்காக உணர்வுபூர்வமாக உழைத்த பெருமகான். அவருடைய காலத்தில்தான் பாடசாலைக்குச் செல்லும் மாணவர்கள் தொகையில் அதிகரிப்பும், கல்வியில் பிரகாசமும் தோன்ற ஆரம்பித்தது. இவற்றிற்கு முக்கிய காரணம்; அவரின் தனிப்பட்ட முயற்சியே ஆகும்.

மாணவர்கள் பாடசாலைக்கு சமூகம் கொடுக்க தவறிய சந்தற்பங்களில் அவர்களின் வீட்டிற்குச் சென்று காரணம் வினவி அழைத்து வருவார். அத்துடன் வகுப்பில் பிந்தங்கிய மாணவர்களுக்கு விசேட வகுப்புகள் நடாத்தி அவர்களுக்கு ஊக்கமும் ஆக்கமும் கொடுத்து அவர்களை கல்வியில் சிறந்தவ்ர்களாக்கி, பாடசாலைக்கும் எமது ஊருக்கும் பெருமையைத் சேர்த்த அந்தப் பெரியவவருக்கு எமது ஊர் என்றென்றும் கடமைப்பட்டுள்ளது.

திருவாளர் அ. கார்த்திகேசு அவர்கள் ஓய்வு பெற அப்பாடசாலையில் ஆசிரியர் பயிற்சிக் கலாசாலையில் பயிற்சி பெற்று உதவி ஆசிரியராக கடமையாற்றி வந்த எனது அண்ணராகிய திரு.சி. செல்வத்துரை அவர்கள் தகமை அடிப்படையில் (இது வரை காலமும் கிறிஸ்தவராக உள்ள ஒருவருக்கே அப் பதவி ஒதுக்கப்பட்டிருந்தது) அப்பாடசாலையின் அதிபராக நியமிக்கப்பெற்றார். திரு. சி. செல்வத்துரை அவர்கள் ஓய்வுபெற; ஆசிரியர் பயிற்சிக் கலாசாலையில் பயிற்சி பெற்று அப்பாடசாலையில் உதவி ஆசிரியராக கடமையாற்றிய சி. கந்தையா ஆகிய எனக்கு அதிபராகும் வாய்ப்பு கிட்டியது.

நானும் சேவையில் ஓய்வு பெற; இப் பாடசாலையில் ஆசிரியர் பயிற்சிக் கலாசாலையில் பயிற்சி பெற்று உதவி ஆசிரியர்களாக கடமையாற்றிய திரு. து. மார்க்கண்டு அவர்களும், அவரின் சேவை ஓய்வை அடுத்து திரு.வ. சுப்பிரமணியம் அவர்களும் அதிபர்களாக பதவியைப் பொறுப் பேற்றனர்.

அதிபர் அ. கார்த்திகேசு அவர்கள் காலத்தில் வளர்ச்சி பெற்ற இப் பாடசாலை எமது காலத்தில் ஊர்ப் பெரியவர்களும், உதவி ஆசிரியர்களாக கடமை புரிந்த திரு. விசுவலிங்கம், திருமதி. சிவபாக்கியம் ஏகாம்பரம் ஆகியவர்களும் எம்மோடு இணைந்து செய்த பெருமுயற்ச்சிகளால் புதிய கட்டிடம் அமைக்கப்பெற்று கல்வியில் உயர்ச்சியும், வளர்ச்சியும் பெற்றது.

பல அறிஞர்களையும், பல்துறை கல்விமான்களையும் உருவாக்கி எமது கிராமத்தில் மறுமலர்ச்சியை ஏற்படுத்திய இப்பாடசாலையில்; அதன் வளர்ச்சிக்காகவும் உயர்ச்சிக்காகவும் உழைத்த அதிபர்களுள் நானும் ஒருவனாக இருந்து ஊருக்கும், ஊர்மக்களுக்கும் சேவை செய்ய கிடைத்த அரும் வாய்பினை பெரும் பேறாக எண்ணி பெரு மகிழ்ச்சி அடைகிறேன்.

நன்றி

சி. கந்தையா (ஓய்வு பெற்ற அதிபர்)

காலையடி - தெற்கு
பண்டத்தரிப்பு

03.01.2009

1876.04.02.14

சாந்தை - சித்தி விநாயகர் ஆலயம் - வரலாறு

E-mail Print PDF
viwaayakar


சாந்தை சித்தி  விநாயகர் ஆலய வரலாறு

ஆக்கம்: திரு. தனேஸ்வரன் சதாபிரசன் (ஸ்பெயின்)

அமைவிடம்
இந்து சமுத்திரத்தின் முத்து என வர்ணிக்கப்படும் லங்காபுரியின் தலையாக பிரகாசிக்கும் யாழ்ப்பாண குடாநாட்டின் வலிகாமம் மேற்கு பகுதியில் பண்டத்தரிப்பு எனப்படும் பழம் பெரும் பட்டினத்துக்குள் இயற்க்கை எழில் பொருந்திய விவசாய பெரும் நிலபரப்புகளும் (வயல்) விண்ணை முட்டும் அரசும்.ஆலும்.மரதமரமும் ஒன்று  இணைந்து  உறவாடும் சாந்தை என்னும் திவ்விய சேஷ்த்திரத்தில் அமைந்துள்ளது சாந்தை சித்தி விநாயகர் ஆலயம்.

ஆதியும் அந்தமும் இல்லாதவன் இறைவன் சாந்தை சித்தி விநாயகர் ஆலயமும் ஆதியும் அந்தமும் அற்றது என்று தான் கூறவேண்டும் கி.மு 250ம் ஆண்டளவில் வெள்ளரசமர கிளைகளுடன் இலங்கை வந்த  அசோகச் சக்கரவர்த்தியின் மகளான சங்கமித்த வட-இலங்கையில் சம்பில்துறை துறைமுகத்தில் வந்து இறங்கி தான் கொண்டுவந்த வெள்ளரசமர கிளைகளில்  ஒன்றை சாந்தை மண்ணில் நாட்டி விநாயகபெருமானை  வழிபட்டு அனுராதபுரம் சென்று அனுராதபுரத்திலும். செல்வகதிர்காமம் தற்பொழுது அமைந்துள்ள இடத்திலுமாக முன்று இடங்களில்  நாட்டினாள் என்று இலங்கையின் வரலாற்று நூல்களில் ஒன்றான  மகாவம்சம் என்னும் நுல் கூறுகின்றது.

ஆலயத்திற்கு முன்பக்க வாசலில் பல நுற்றாண்டு பழமை வாய்ந்த வேப்பமரம் ஒன்றும் இருந்துள்ளதனால்  இவ் ஆலயம் அமைந்துள்ள இடத்தை வேம்படி என்றும் அழைப்பார்கள். அது தற்போதும் சிலரிடம் வழக்கத்தில் உண்டு. 1992ம் ஆண்டு காலபகுதியில் இடம்பெற்ற யுத்தத்தில் இவ்மரம் சேதம்அடைந்து முற்றாக அழிந்துவிட்டது. இவ் யுத்தகாலத்தில் இவ்மரம் உட்பட அருகில் இருந்த சாந்தை சித்தி விநாயகர் சனசமுகநிலயம்.சிற்றம்பலவித்தியாலயம் என்பனவும் பல சேதங்களுக்கு உள்ளாகி இடிபாடுகளுடன் காணப்பட்டபோதும் எம்பெருமானின் ஆலயம்மட்டும் எவ்வித சேதமும் இன்றி பழமையுடன் காணபட்டது அனைவரையும் வியக்கவைத்தது.

இவ் ஆலயம் முன்பு தனிநபர் ஒருவருக்கே சொந்தமானதாகவும் அவரினாலேயே பராமரிக்கபட்டு பூஜைகளும் நடாத்தபட்டு வந்தது. பிற்கால பகுதியில் ஊர் மக்கள் விரும்பியபடி பரிபாலனசபை தெரிவு செய்யபட்டு பரிபாலன சபையிடம் கையளிக்கப்பட்டு; இன்று இலங்கை இந்து சமய கலாச்சார அமைச்சின் கீள் பதிவு செய்யப்பட்ட ஆலயமாக திகழ்கின்றது. மிகவும் பழமை வாய்ந்த ஆலயம் என்பதனால் 1995ம் ஆண்டு காலபகுதியில் ஆலய கட்டடங்களும் கூரைகளும் இன்றைக்கோ நாளைக்கோ இடிந்து விழும் நிலையில் காணப்பட்டது. ஆலயத்தை புனரமைக்க தீர்மானித்த ஊர் மக்கள் 1999 ஆண்டு திருப்பணிச்சபை ஒன்றை தெரிவு செய்து எம்பெருமானுக்கும் பரிபாலன மூர்த்திகளுக்கும் பாலஸ்தானம் செய்யபட்டது. பழைய ஆலயம் முற்று முழுதாக அகற்றப்பட்டு புதிய ஆலயத்திற்கான  ஆதிமுல அத்திவாரம் 1999ம் ஆண்டு ஆவணிமாதம் இடப்பட்டு திருப்பணிவேலைகள் மேற்கொள்ளப்பட்டு வந்தன.

இடைக்காலப்பகுதியில் திருப்பணிச்சபை கலைக்கப்பட்டு பரிபாலனசபையினராலே திருப்பணிவேலைகள் மேற்கொள்ளப்பட்டது ஆகம முறைப்படி அமைக்கப்பட்ட புதிய ஆலயத்திற்கு 2001ம் ஆண்டு ஐப்பசி மாதம் 22ம் திகதி புனர்வத்த மகா கும்பாவிசேகம் சிவ ஆகம தத்துவ நிதி ஸ்ரீ ஆறுமுகநாவல குருக்கள் அவர்களால் செய்துவைக்கப்பட்டது. புதிய ஆலயத்தை அமைப்பதற்கு அப்போதைய பரிபாலனசபை தலைவராக இருந்த திரு  செல்வராசா  சிவசந்திரபோஸ் அவர்கள் ஆற்றிய பணி அளப்பரியது,  2003ம் ஆண்டு தைமாதம் பஞ்சமுக விநாயகர் பிரதிஸ்டை இடம்பெற்றது.

அண்மையில் ஆலயத்தில் இடம்பெற்ற அதிசயம் ஒன்று.
ஆலய கருவறையில் இருந்து  விநாயகபெருமான்  எழுந்தருளி நடந்தது போன்று கருவறையில் இருந்து நந்திபலிபீடம் அமைந்துள்ள இடம்வரை விநாயகபெருமானின் பாதச்சுவடுகள்  காணப்பட்டது. அப்பாதசுவடுகள் தற்போதும் ஆலயத்தில் காணக்கூடியதாக உள்ளது. இதற்க்குமுன்னரும்  இவ்வாறு  பல அதிசயங்கள் இடம்பெற்றுள்ளன. இவை அனைத்தும் இறைவனின் அற்புதத்தையும் ஆலயத்தின் மகிமையையும் எடுத்துக்காட்டுவதாக திகழ்கின்றது.

ஆகம முறைபடி அமைக்கபட்ட புதிய ஆலயத்தின் அமைப்பு.

"ஆற்றரு நோய்மிக் கவனி மழையின்றிப்
போற்றரு மன்னரும் போர்வலி குன்றுவர்
கூற்றுதைத் தாந்திருக் கோயில்க ளெல்லாஞ்
சாற்றிய பூசைகள் தப்பிடில் தானே"


என்பது திருமூலர் திருவாக்கு.  இங்கே சாற்றிய பூசைகள் என்பது சிவாகமங்களில் விதிக்கப்பட்ட முறைகள் என்று பொருள்.
சிவாகமங்களில் விதிக்கபட்ட முறைகளின்படி ஆலயத்தின் அமைப்பானது மனிதன் ஒருவன் நீட்டி நிமிர்ந்து  படுத்திருப்பதை ஒத்தது. அந்த வகையில் சாந்தை சித்தி விநாயகர் ஆலயமும் அமைந்துள்ளது.  மூலஸ்தானத்தில் சித்திவிநாயகரும். சபைமண்டபத்தில் ஐந்துமுகவிநாயகரும். ஆனைமுகஎழுந்தருளி விநாயகர் சகிதம் ஞனவேலும் காணப்படுகிறது. மற்ரும்  வைரவர், சண்டேஸ்வறருக்கும்  சிறிய ஆலயங்களும் உயர்ந்த மணிக் கோபுரமும், மடப்பள்ளி, களஞ்சியஅறையும் காணப்படுகின்றது. ஆலய தலவிருட்சமாக ஆலய உள்வீதியில் காணப்படும் வேப்பமரம் கருதபடுகிறது ஆலயவெளிச் சூழல் எந்தநேரமும் அமைதிநிறைந்து காணப்படும்.
ஆயயத்திலிருத்ந்து  200m தூரத்தில் இலுப்பை மரத்தின் கீள் வீற்றிருக்கும் காளி அம்பாளின்  ஆலயமும் அமைந்துள்ளது.

பூஜைகளும் விழாக்களும்:
தினமும் இரண்டு நேர நித்திய பூஜையும்  ஆவணி மாத வளர்பிறை விநாயகர் சதுர்த்திக்கு முன்பு பன்னிரண்டு நாட்கள் அலங்காரதிருவிழாவும். மாதம் தோறும்  வளர்பிறை சதுர்த்தியும். மற்றும் பிள்ளையார் கதை, திருவெம்பாவை  என்பன  சிறப்பாக இடம்பெற்று வருகின்றன. விசேட பண்டிகை தினங்களிலும் விசேட பூஜை வழிபாடுகள் இடம் பெற்று  வருகிண்றன.

அலங்கார உற்சவ இறுதி நாளாகிய ஆவணி சதுர்த்தி தினத்தன்று பஞ்சமுக விநாயக பெருமான் பஞ்சமுக மஞ்சத்தில் வீதிவலம் வரும் கண்கொள்ளா காட்சியை கண்ட அடியவர் ஒருவர் மெய்மறந்து பாடியபாடல்.பஞ்சமுகம் கொண்டு பாவங்கள் அகற்றிட

அலங்காரம் நிறைந்த எங்கள் ஊர்  ஐங்கரன்
பஞ்சமுகமஞ்சம் தன்னில் ஆடிஆடிவருகையில்
அடியேன் அகங்காரமற்ருநின்றேன்.

சாந்தை சித்தி விநாயகர் ஆலயத்திற்க்கான இளைஞர்களின் பங்களிப்பு:
சாந்தை சித்தி விநாயகர் ஆலயத்தின் திருப்பணி வேலைகளுக்கான நிதியினை சேகரிப்பதிலும், ஆலயத் தொண்டு செய்வதிலும் இளைஞர்கள் முன்னின்று செயல்பட்டு வருகின்றனர்.  அத்துடன், அலங்கார உற்சவ இறுதி நாளில் விநாயக பெருமான் வீதிவலம் வருவதற்கான பஞ்சமுக திருமஞ்சம் 2006 ஆண்டு  இளைஞர்களின் முயற்ச்சியினால் அமைக்கபட்டது. மற்றும்  ஆலயத்தில் கூட்டு வழிபாடு நடாத்தியும், சமயப் பிரசங்கங்கள் செய்தும் ஊர்மக்களை ஆசார சீலர்களாகவும், சயப்பற்றுள்ளவர்களாகவும் வாழ வழிகாட்டி வருகின்றனர்.

"உள்ளது போகாது: இல்லது வாராது" என்று நம்பும் இறை உணர்வாளர்கள் அன்பே வடிவான ஆண்டவனை ஆலயத்தில் தரிசித்து, அன்புருவாக நெகிழ்ந்து நிற்போம். ஆன்மாக்கள் அன்பில் லயிக்கும் ஆலயமே நம் அழுக்குகள் களையும் பலிபீடம்.

ஐங்கரனை மனம் உருக தொழு மனமே
உன் ஐம்புலனும் ஐங்கரன் பாதத்தில்
வைத்திடவே நீர் கேட்பதெல்லாம்
நினைப்பதெல்லாம் அருளிடுவான்
சாந்தை ஊர் சித்தி விநாயகனே.

ஓம் விநாயகா ஓம்

Page 126 of 126

முத்துமாரி அம்மன் ஆலயம்

ஞான வேலாயுதர் ஆலயம்

சித்தி விநாயகர் ஆலயம் - சாந்தை

சம்புநாதீஸ்வரர் ஆலயம்

காடேறி ஞானபைரவர் ஆலயம்